Cenevrədə Anım Günü münasibətilə tədbir keçirilib
Cenevrə, 2 oktyabr, AZƏRTAC
Azərbaycan Respublikasının Cenevrədəki BMT bölməsi və digər beynəlxalq təşkilatlar yanında daimi nümayəndəliyində 44 günlük Vətən müharibəsinin başlamasının ildönümünə həsr olunmuş anım tədbiri keçirilib.
AZƏRTAC xəbər verir ki, tədbirdə Cenevrədə akkreditə olunmuş diplomatik korpusun nümayəndələri, bu ölkədə yaşayan azərbaycanlılar, həmçinin Azərbaycanın İsveçrə Konfederasiyasındakı səfiri Fuad İsgəndərov, səfirliyin və daimi nümayəndəliyin əməkdaşları iştirak ediblər.
Əvvəlcə Azərbaycan Respublikasının Dövlət Himni səsləndirilib, Vətən müharibəsi şəhidlərinin xatirəsi birdəqiqəlik sükutla yad edilib.
Qonaqları salamlayan daimi nümayəndə Qalib İsrafilov bir il əvvəl sentyabrın 27-də Ermənistanın davamlı təxribatlarına cavab olaraq Azərbaycan Respublikası Silahlı Qüvvələrinin cəbhənin bütün istiqamətləri üzrə əks-hücum əməliyyatlarına başladığını diqqətə çatdırıb. Qeyd edilib ki, Azərbaycan bu əməliyyatları özünümüdafiə hüququ çərçivəsində və beynəlxalq humanitar hüquqa uyğun olaraq həyata keçirib. Vətən müharibəsi Azərbaycan ərazisinin böyük hissəsinin Ermənistan tərəfindən 30 ilə yaxın davam edən işğalına son qoyub. Nəticədə Azərbaycan ərazi bütövlüyünü və bir milyona yaxın köçkün azərbaycanlının əsas hüquqlarını bərpa edib, BMT Təhlükəsizlik Şurasının 1993-cü il tarixli müvafiq qətnamələrinin icrasını təkbaşına təmin edib.
Tədbirdə Azərbaycanın ərazi bütövlüyünün bərpası uğrunda gedən mübarizəyə dair videomateriallar nümayiş olunub.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
