Cənubi Koreya ABŞ şirkətini 760 milyon dollar cərimələyib
Pekin, 13 aprel, AZƏRTAC
Cənubi Koreyanın Ali Məhkəməsi ABŞ-ın çip istehsalçısı olan “Qualcomm” şirkətinin ədalətsiz rəqabətə görə 1,03 trilyon von (təxminən 760 milyon ABŞ dolları) cərimələnməsi barədə Seul məhkəməsinin qərarını qüvvədə saxlayıb.
AZƏRTAC “Yonhap” agentliyinə istinadla xəbər verir ki, Koreya Respublikasının antiinhisar qurumu olan Ədalətli Ticarət Komissiyası məhkəmənin qərarını alqışlayıb və onun icrasını diqqətdə saxlayacağını bildirib.
Qeyd edək ki, komissiya “Qualcomm” və onun iki törəmə şirkətini Koreyanın rəqabət qanunlarını pozmaqda təqsirkar bilərək, 2016-cı ilin dekabrında 1 trilyon von məbləğində cərimələnməsinə qərar verib. “Qualcomm”, həmçinin mobil rabitə bazarındakı dominant mövqeyindən sui-istifadədə günahlandırılıb.
ABŞ şirkəti komissiyanın ittihamlarını rədd edərək, 2017-ci ildə Seul məhkəməsinə müraciət etmişdi. Seul məhkəməsi 2019-cu ildə verdiyi qərarda Ədalətli Ticarət Komissiyasının təyin etdiyi 10 islah tədbirindən səkkizini haqlı sayıb.
Bu, Cənubi Koreyanın Ədalətli Ticarət Komissiyası tərəfindən təyin olunan ən böyük cərimə məbləğidir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
