CƏZA ÇƏKƏNLƏRİN TƏRBİYƏSİ İŞİNDƏ AZƏRBAYCANIN TƏCRÜBƏSİ YÜKSƏK QİYMƏTLƏNDİRİLMİŞDİR

26.02.2004 [22:30]
Çap et
A⁺ A^-

Azərbaycan Respublikası Ədliyyə Nazirliyi Məhkəmə Qərarlarının İcrası Baş İdarəsinin mətbuat xidmətindən AZƏRTAC-a bildirmişlər ki, son illər Azərbaycanın penitensiar sistemində aparılan mütərəqqi islahatların tərkib hissəsi kimi cəza çəkənlərin tərbiyəsində, onların azadlığa çıxdıqdan sonra cəmiyyətə uyğunlaşmasında, dünyagörüşünün formalaşmasında mühüm rol oynayan bir sıra tədbirlər həyata keçirilir. Bu qəbildən tədbirlərə məhkumlardan təşkil olunmuş özfəaliyyət kollektivlərinin, teatr dərnəklərinin fəaliyyətini və bu işə tanınmış incəsənət xadimlərinin cəlb edilməsini göstərmək olar. 2003-cü ildə bir sıra cəzaçəkmə müəssisələrində S.Vurğunun məhkumların iştirakı ilə səhnələşdirilmiş “Vaqif” pyesinin tamaşasında bəzi xarici dövlətlərin, o cümlədən “BRİTİSH COUNCIL” təşkilatının nümayəndələri də iştirak etmiş və bu təşəbbüsü yüksək qiymətləndirmişlər.

“BRİTİSH COUNCIL” təşkilatının direktoru xanım Marqaret Çek “Cəzaçəkmə müəssisələrində forum teatrı” layihəsinin müzakirəsi ilə əlaqədar fevralın 25-də ədliyyə nazirinin müavini general-mayor A.Qasımovla görüşmüşdür. Görüş zamanı cəza çəkən şəxslərin azad olunandan sonra cəmiyyətə yenidən inteqrasiyasına şərait yaratmaq, onların gələcəkdə qeyri-kriminal həyat tərzi sürmələrinə kömək məqsədi ilə bu adamlara mənəvi-estetik dəyərlərin aşılanması üsulları müzakirə olunmuşdur. Bu layihə çərçivəsində respublikamızın cəzaçəkmə müəssisələrində Azərbaycan və ingilis müəlliflərinin əsərlərinin məhkumların ifasında səhnələşdirilməsi sahəsində əməkdaşlığın həyata keçirilməsinə dair razılıq əldə edilmişdir. Bu işə ölkəmizdə fəaliyyət göstərən “Yuğ” teatrının cəlb olunması nəzərdə tutulmuşdur.

Görüşün sonunda qonaqlar Məhkəmə Qərarlarının İcrası Baş İdarəsində yaradılmış “Penitensiar tarix muzeyi” ilə tanış olmuşlar.