SİYASƏT
Çağırışçılar: Ordu sıralarına yollanmaqdan qürur duyuruq FOTO
Masallı, 2 oktyabr, İsmayıl Cəfərli, AZƏRTAC
Oktyabrın 2-də Səfərbərlik və Hərbi Xidmətə Çağırış üzrə Dövlət Xidmətinin Masallı rayon şöbəsində çağırışçıların təntənə ilə hərbi xidmətə yola salınması mərasimi keçirilib. Tədbirdə çıxış edənlər gənclərin həvəslə və böyük ruh yüksəkliyi ilə hərbi xidmətə yola düşdüklərini vurğulayıblar.
AZƏRTAC xəbər verir ki, “Azərbaycan Respublikası vətəndaşlarının 2020-cu il oktyabrın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” Azərbaycan Respublikası Prezidentinin Sərəncamının icrası ilə bağlı Masallı rayonunda gənclərin hərbi xidmətə yola salınması münasibətilə tədbir keçirilib.
Mərasimdə Masallı rayon rəhbərliyi, rayonun hüquq-mühafizə orqanlarının, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəhbərliyi, ağsaqqallar və Qarabağ müharibəsi əlliləri, çağırışçı gənclər və rayon ictimaiyyətinin nümayəndələri iştirak ediblər. Tədbirdə çıxış edənlər qüdrətli ordumuzun sıralarına qədəm qoyacaq gənc çağırışçılara şərəfli xidmətlərində uğurlar arzulayıblar. Bildirilib ki, müzəffər ordumuz düşmən üzərinə irəliləyərək torpaqlarımızı işğaldan azad edir.
Gənc çağırışçı Məhəbbət Bayramov: “Bu gün ordu sıralarına yollanmaqdan qürur duyuram. Hər bir gənc kimi, mən də həqiqi hərbi xidmətdə lazımi bilgiləri öyrənib, Vətənin keşiyində ayaq-sayıq dayanacağam”.
Digər çağırışçı Murad Nağıyev: “Bu gün yaşıdlarım kimi, məndə həqiqi hərbi xidmətə yola düşürəm. Valideynlərimi və dostlarımı əmin etmək istəyirəm ki, şərəflə xidmət edib onların yanına qayıdacağam. İndi Azərbaycanın güclü və qüdrətli ordusu var, bu orduda xidmət etməkdən şərəf duyacağam”.
Mərasimdə çıxış edənlər hərbi xidmətə yola salınan gəncləri təbrik edib, onları Vətənin müdafiəsi kimi müqəddəs işdə ayıq sayıq olmağa çağırıb, komandirlərin tələblərinə əməl etməyi, ölkəmizin ərazi bütövlüyünü möhkəm qorumağı, hərb işinin sirlərinə mükəmməl yiyələnməyi tövsiyə ediblər.
Daha sonra hərbi xidmətə yola düşən gənclərin valideynləri çıxış edərək, övladlarının hərbi xidmətə yola düşmələrindən qürur duyduqlarını bildiriblər.
Valideyn Şəmsəddin Nəsirov: “Mən oğlumu hərbi xidmətə yola salıram. Bir valideyn kimi çox qürurluyam. Vətəni qorumaq hər bir övladın borcudur. Bizim də uşaqlarımız bu şərəfli məktəbdə dərs almağa gedirlər. O gün olsun, Qarabağ tezliklə azad edilsin”.
Digər valideyn Balaxanım Həsənova: “Çox həyəcanlıyam. Oğlumu xidmətə yola salmaq üçün gəlmişəm. Bu gün orduya gedən oğullarımız sağ-salamat gəlsinlər. Biz Ali Baş Komandanımızın yanındayıq. Allah Ordumuzu müzəffər etsin”.
Mərasimin sonunda gənc çağırışçılar üçrəngli bayrağımızı öpüb hərbi hissələrə yola düşüblər.