Çernobıl qəzası əlilləri hər zaman dövlət qayğısı ilə əhatə olunublar
Bakı, 25 aprel, AZƏRTAC
Hər il aprel aynın 26-da MDB, həmçinin Şərqi Avropanın bir sıra ölkələrində 20-ci əsrin ən dəhşətli qəzalarından biri olan Ukraynanın Pripyat şəhərindəki Çernobıl Atom Elektrik Stansiyasının 4-cü blokunda baş vermiş qəzanın ildönümü qeyd olunur. Stansiyada baş vermiş partlayış və yanğın nəticəsində yaranmış radioaktiv bulud Şərqi Avropanın böyük bir hissəsini bürüyüb, həmçinin cənub istiqamətində hərəkət edərək böyük bir ərazini radioaktiv maddələrlə zəhərləyib.
Bəşəriyyət üçün ən dəhşətli texnogen faciələrdən biri olan Çernobıl qəzasının ildönümü ilə bağlı Nəsimi Rayon İcra Hakimiyyəti rəhbərliyi ilə qəzanın aradan qaldırılmasının iştirakçıları olmuş rayon sakinlərinin görüşü keçirilib.
Rayon icra hakimiyyətinin mətbuat xidmətindən AZƏRTAC-a verilən xəbərə görə, görüşdə çıxış edən icra başçısı Asif Əsgərov bildirib ki, hadisə nəticəsində 7 min nəfər həyatını itirib, 25 min nəfər isə güclü radiasiyaya məruz qalaraq ömürlük şikəst olub. Ukrayna və Belarusda 300 min nəfər öz yaşayış yerlərini tərk etmək məcburiyyətində qalıb. II Dünya müharibəsi illərində Yaponiyanın Xirosima və Naqasaki şəhərlərinə atılmış atom bombalarının fəsadlarına bərabər tutulan bu qəzanın nəticələrinin aradan qaldırılması üçün SSRİ-nin bütün respublikalarından minlərlə insan cəlb olunub. 1986-cı ildə Azərbaycandan da 7 mindən çox insan bu qəzanın aradan qaldırılması üçün Çernobıla yola düşüb. Təhlükəli və ağır şəraitdə işləmək iştirakçıların əksəriyyətinin səhhətinə ciddi təsir göstərib. Belə ki, hadisədən artıq 32 il keçməsinə baxmayaraq, iştirakçıların əksəriyyəti bu gün də əziyyət çəkirlər.
İcra başçısı öz çıxışında Çernobıl qəzası zamanı əlil olmuş vətəndaşların dövlət qayğısı ilə əhatə olunduğunu da vurğulayıb.
Tədbirdə iştirak edən “Azərbaycan Çernobıl Əlilləri İttifaqı” İctimai Birliyinin sədri Mirhəsən Həsənov bildirib ki, o vaxtlar sovet hakimiyyəti Qərb dövlətlərinə öz gücünü nümayiş etdirmək məqsədilə bu faciənin fəsadlarını gizli saxlamağa çalışırdı. Odur ki, qəzanın törətdiyi dağıntıların aradan qaldırılmasında iştirak edərək sağlamlığını itirmiş insanları taleyin hökmünə buraxmışdı. Vurğulanıb ki, yalnız ümummilli lider Heydər Əliyevin Azərbaycanda hakimiyyətə qayıdışından sonra Çernobıl əlillərinin sosial durumu yaxşılaşdırılıb, onların statusu müəyyənləşdirilib, sosial problemlərinin həlli istiqamətində ardıcıl tədbirlər görülüb, onlara dövlət tərəfindən müavinət təyin edilib. Bu qayğı Prezident İlham Əliyev tərəfindən də uğurla davam etdirilir. Dövlətimizin başçısının təşəbbüsü ilə faciə iştirakçılarının müavinətləri dəfələrlə artırılıb, onların sosial müdafiəsi gücləndirilib.
Çernobılçılar adından çıxış edən cəmiyyətin Nəsimi Rayon Təşkilatının sədri Xələf Həsrətov, “Qarabağ müharibəsi veteranları, əlilləri və şəhid ailələri” İctimai Birliyinin Nəsimi rayon şöbəsinin sədri Azər Quliyev və başqaları onlara göstərilən diqqət və qayğıya görə ölkə rəhbərinə minnətdarlıqlarını bildiriblər.
Tədbirin sonunda Çernobıl əlillərinə yardımlar paylanılıb.
Bölmənin digər xəbərləri
