Çexiyada hakimiyyət qolları arasında mübahisə: Prezident Petr Pavel məhkəməyə müraciət edib
Praqa, 23 iyun, AZƏRTAC
Praqada Prezident ilə hökumət arasında səlahiyyət bölgüsü ilə bağlı hüquqi mübahisə yeni mərhələyə keçib. Çexiya Prezidenti Petr Pavel hökumətin onun NATO sammitində iştirakını məhdudlaşdıran qərarına etiraz edərək Konstitusiya Məhkəməsinə müraciət edib.
AZƏRTAC xəbər verir ki, Çexiyanın Prezident Administrasiyasının açıqlamasına görə, Pavel məhkəmədən dövlət başçısının beynəlxalq sammitlərdə ölkəni təmsil etmək səlahiyyətinin kimə məxsus olduğunu aydınlaşdırmağı xahiş edib. O, həmçinin hökumətin prezidentin konstitusion səlahiyyətlərini həyata keçirməsinə mane olmaması barədə qərar çıxarılmasını tələb edir.
Mübahisə hökumətin iyulda keçiriləcək NATO sammitində nümayəndə heyətinə Baş nazirin rəhbərlik etməsi barədə qərarından sonra yaranıb. Nazirlər Kabineti Prezidentin sammitdə iştirakını nəzərdə tutmadığını bəyan edib.
Konstitusiya Məhkəməsi şikayətin qəbul edildiyini təsdiqləyib və işə prioritet qaydada baxılması məsələsini müzakirə edəcəyini bildirib. Ekspertlər hesab edirlər ki, qərar Çexiyada Prezident və hökumət arasında səlahiyyət bölgüsünə dair mühüm presedent yarada bilər.
Bölmənin digər xəbərləri
