Çexiyada illik inflyasiya səviyyəsi son 10 ilin ən aşağı səviyyəsinə düşüb
Praqa, 13 fevral, AZƏRTAC
Yanvar ayında Çexiyada istehlak qiymətlərinin artım tempi əhəmiyyətli dərəcədə azalıb: illik inflyasiya 1,6 faizə düşərək 10 ildən çox müddətdə ən aşağı səviyyəyə çatıb.
AZƏRTAC xəbər verir ki, bu göstərici dekabr ayı ilə müqayisədə yarım faiz bəndi azalıb. Əsas amil bərpaolunan enerji mənbələrinin dəstəklənməsi xərclərinin ev təsərrüfatlarından dövlət büdcəsinə keçirilməsi qərarı olub. Aylıq qiymətlər isə əsasən qida, içki və tütün məhsullarının qiymətlərinin artması səbəbindən 0,9 faiz artıb. Elektrik enerjisi və yanacaq qiymətləri də əhəmiyyətli dərəcədə aşağı düşüb.
Eyni zamanda, xidmətlər artmaqda davam edib: mənzil kirayəsi, yerləşdirmə, turizm və kommunal xidmətlərin qiymətləri artıb. Ekspertlər hesab edirlər ki, xidmət sektoru inflyasiya təzyiqinin əsas mənbəyi olaraq qalır.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
