Çin hökuməti səfirlik layihəsinin təxirə salınması ilə bağlı Böyük Britaniyaya etiraz edib
London, 17 oktyabr, AZƏRTAC
Çin hökuməti Londonda meqasəfirlik tikintisi ilə bağlı qərarın yenidən təxirə salınmasına etiraz edərək Böyük Britaniyanı mümkün nəticələrlə bağlı xəbərdar edib.
AZƏRTAC BBC-yə istinadla xəbər verir ki, Çin 2018-ci ildə Londonun “Royal Mint Court” ərazisindəki sahəni 255 milyon funt sterlinqə satın alıb. Pekinin yeni səfirlik üçün müraciəti ilk dəfə 2022-ci ildə Londonun Tauer Hemlets Şurası tərəfindən təhlükəsizlik səbəblərinə görə rədd edilmişdi. Lakin Çin ötən il müraciəti yenidən təqdim edib.
Britaniya hökuməti isə mübahisəli səfirlik layihəsi ilə bağlı qərarı artıq ikinci dəfə dekabrın 10-dək təxirə salıb. Çinin Xarici İşlər Nazirliyi bu addımı Böyük Britaniyanın Çinlə münasibətləri yaxşılaşdırmaqla bağlı əvvəlki öhdəliklərinə və bəyanatlarına zidd adlandırıb. Əgər layihə təsdiqlənsə, 20 min kvadratmetr sahəsi olan yeni bina Avropada ən böyük səfirliyi olacaq.
Çinin Xarici İşlər Nazirliyinin sözçüsü Lin Jian Böyük Britaniyanı layihəni müxtəlif bəhanələrlə gecikdirməkdə və məsələni siyasiləşdirməkdə ittiham edib. O, bir daha Böyük Britaniyanı öhdəliklərini yerinə yetirməyə çağırıb. Qeyd edib ki, əks halda yaranacaq nəticələrə görə məsuliyyət rəsmi Londonun üzərinə düşəcək.
Britaniya hökumətinin nümayəndəsi isə cavabında bildirib ki, rəsmi London heç bir öhdəlik və ya vəd tanımır. O, əsas prioritetin milli təhlükəsizlik olduğunu vurğulayıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
