Çin Lideri Səudiyyə Ərəbistanı vəliəhdi ilə Yaxın Şərq böhranını müzakirə edib
Bakı, 20 aprel, AZƏRTAC
Çinin Sədri Si Cinpin bazar ertəsi günü ABŞ-İran münaqişəsi fonunda “hərtərəfli” atəşkəs və gəmilərin Hörmüz boğazından normal keçidinə çağırıb.
AZƏRTAC Sinxua agentliyinə istinadla xəbər verir ki, Çin lideri bu barədə Səudiyyə Ərəbistanı vəliəhdi Muhammed bin Salmanla telefon danışığı zamanı bildirib. O, boğazdan normal keçidin regional ölkələrin və beynəlxalq ictimaiyyətin ortaq maraqlarına xidmət etdiyini vurğulayıb.
Si Cinpin əlavə edib ki, Pekin regional ölkələri mehriban qonşuluq, inkişaf, təhlükəsizlik və əməkdaşlıq, öz gələcək və taleyinə sahib olmaq, regionda uzunmüddətli sülh və sabitliyin təşviqi ilə xarakterizə olunan ortaq bir ev qurmaqda dəstəkləyir.
Çin lideri əlavə edib ki, Pekin dərhal və hərtərəfli atəşkəsi, hərbi əməliyyatların dayandırılmasını, sülhün bərpasına kömək edən bütün səyləri dəstəkləyir, həmçinin mübahisələrin siyasi və diplomatik yollarla həllinə sadiq qalır. O, Çinin Səudiyyə Ərəbistanı ilə strateji qarşılıqlı etimadı dərinləşdirmək və praktik əməkdaşlığı gücləndirmək istəyini ifadə edib.
Bu, ABŞ və İsrailin fevralın 28-də İrana qarşı müharibəyə başlamasından bəri Çin Sədrinin Yaxın Şərq lideri ilə ilk telefon danışığıdır.
Bölmənin digər xəbərləri
