Çin Sincan Uyğur bölgəsi ilə bağlı Qərb ölkələrinin ittihamlarını rədd edir
Pekin, 21 dekabr, AZƏRTAC
Çin tərəfi ölkənin Sincan Uyğur muxtar bölgəsində insan hüquqlarının və dini etiqad azadlığının pozulması ilə bağlı bəzi Qərb ölkələrinin ittihamlarını rədd edir.
AZƏRTAC xəbər verir ki, dekabrın 21-də Çin Xarici İşlər Nazirliyində mövzuya dair keçirilən mətbuat konfransında Çin Kommunist Partiyasının Sincan Uyğur muxtar bölgəsi üzrə təbliğat departamentinin direktor müavini Su Quysian, bölgənin xalq hökumətinin rəsmisi Elican Anayat, Hotan şəhərindəki cümə məscidinin imamı Obulhasan Tursunniyaz yuxarıda qeyd olunan məsələlər barədə danışıblar.
Ötən illərdə törədilən terror aktlarından danışan Çin rəsmiləri radikal qrupların milliyyətcə uyğur olan bəzi insanların dini inanclarından sui-istifadə edərək, onları terrorçuluğa və ekstremizmə sürüklədiklərini deyiblər. Bildirilib ki, Çində dini etiqad azadlığı təmin edilib, ölkədə, o cümlədən Sincan bölgəsində yüzlərlə məscid, din xadimi fəaliyyət göstərir.
Mətbuat konfransında Sincan Uyğur muxtar bölgəsində antiterror və de-ekstremizm fəaliyyəti çərçivəsində yaradılan peşə-təlim mərkəzləri, orada təlim alan uyğun gənclərinin Çinin müxtəlif vilayətlərindəki istehsal müəssisələrində məcburi əməyə cəlb olunması ilə bağlı bəzi Qərb mətbuatında yayılan məlumatların həqiqəti əks etdirmədiyi diqqətə çatdırılıb. Bildirilib ki, həmin mərkəzlərə cəlb edilənlərə müxtəlif dillər, hüquq tədris olunur, peşə bacarıqları artırılır, onlar təlimlərdən sonra öz istəklərinə uyğun iş tapıb, qanuni əsaslarla çalışırlar.
Mətbuat konfransında iştirak edən bir neçə uyğur gənc peşə-təlim mərkəzlərindəki təlimlər və yaşayış rejimi barədə məlumat veriblər.
Çin muxtar rayonunun əhalisi üçün daha yaxşı və sabit sosial mühiti təmin etmək məqsədilə radikalizmin və terrorizmin aradan qaldırılmasına çalışır. Bundan başqa, bölgənin sosial-iqtisadi inkişafı, əhalinin məşğulluğunun təminatı istiqamətində əhəmiyyətli işlər görülür. Bunun nəticəsidir ki, əhalinin orta aylıq əməkhaqqı yüksəlib.
Hotan şəhərindəki cümə məscidinin imamı Obulhasan Tursunniyaz bildirib ki, uyğurların dini ayinləri yerinə yetirməsinə məhdudiyyət qoyulması ilə bağlı fikirlər əsassızdır.
Qeyd edək ki, bəzi Qərb ölkələrinin rəsmiləri və mətbuatı Çin hökumətinin Sincan bölgəsində uyğur müsəlmanlara təzyiqlər göstərdiyini, xeyli sayda uyğurun peşə təlimi adı altında xüsusi düşərgələrdə saxlanıldığını, onların məcburi əməyə cəlb edildiyini, bölgədə dini etiqad azadlığının məhdudlaşdırıldığını bəyan edirlər. Cari ilin iyununda isə Prezident Donald Trampın imzaladığı "Uyğur insan hüquqları siyasəti aktı" adlı qanun Çin rəsmilərinin ABŞ-dakı bank hesablarının dondurulmasına və onların Birləşmiş Ştatlara səfər etməsinə qadağalar qoymaq imkanı yaradıb. Çin tərəfi bu cür addımların Sincan Uyğur muxtar bölgəsində insan hüquqları ilə bağlı vəziyyəti qəsdən ləkələmək, beynəlxalq hüququ və beynəlxalq münasibətləri tənzimləyən əsas normaları kobudcasına pozmaq, Çinin daxili işlərinə kobud müdaxilə etmək kimi qiymətləndirib. Rəsmi Pekin "Sincan məsələsi"nin insan hüquqları, etnik və dini məsələlərlə əlaqəli olmadığını, əslində zorakılıq, terrorizm və separatçılıqla mübarizə olduğunu bir daha bəyan edir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
