Çin Ukraynada müharibə tərəflərinə silah satmayacağını bildirib
Bakı, 14 aprel, AZƏRTAC
Çin Ukraynada müharibə tərəflərinə silah satmayacaq və ikili təyinatı olan məhsulların ixracına nəzarəti artıracaq.
AZƏRTAC xəbər verir ki, bu barədə ÇXR xarici işlər naziri Tsin Qan Pekində almaniyalı həmkarı Annalena Berbok ilə birgə mətbuat konfransında deyib.
Çinin xarici siyasət idarəsinin rəhbəri ölkəsinin Ukrayna böhranının sülh yolu ilə həlli üçün səy göstərdiyini bildirib. Onun sözlərinə görə, tərəflərdən hər birinin təhlükəsizlik sahəsində maraqları nəzərə alınmasa, böhran və münaqişələr qacınılmazdır.
Annalena Berbok Ukrayna ətrafında yaranan vəziyyətin nizamlanması işində BMT Təhlükəsizlik Şurasının üzvü kimi Çinin xüsusi məsuliyyəti olduğunu qeyd edib. O, həmçinin Tayvan məsələsinə toxunaraq, regionda münaqişənin qlobal fəlakətə səbəb ola biləcəyini və Berlinin “vahid Çin prinsipini” dəstəklədiyini deyib.
Tsin Qan isə öz növbəsində Tayvan probleminin Çinin daxili işi olduğunu və Pekinin bu məsələdə xarici müdaxiləyə yol verməyəcəyini vurğulayıb.
Bir müddət öncə ABŞ Prezidenti Cozef Bayden və NATO-nun Baş katibi Yens Stoltenberq Çinin Rusiyaya silah göndərməsi faktlarının qeydə alınmadığını bildirmişdi.
Bölmənin digər xəbərləri
