Çində 3 milyard yuanlıq korrupsiya əməlində təqsirli bilinən sabiq məmur edam edilib
Pekin, 17 dekabr, AZƏRTAC
Çində məhkəmənin hökmü ilə 3 milyard yuandan çox (təxminən 427 milyon ABŞ dolları) korrupsiya əməlində təqsirli bilinən Daxili Monqolustan muxtar bölgəsinin Hohhot şəhərinin iqtisadi və texniki inkişaf zonasının partiya komitəsinin sabiq katibi Li Cienpin edam edilib.
AZƏRTAC xəbər verir ki, edam cəzası Ali Məhkəmənin aşağı instansiya məhkəməsinin qərarını təqsdiqləməsindən sonra dekabrın 17-də icra olunub. Ali Məhkəmə sabiq məmurun cinayətlərinin son dərəcə ağır, rüşvət şəklində xərclənən və alınan məbləğin həddən artıq böyük olduğunu, dövlətə və ictimai maraqlara ciddi ziyan vurduğunu təsdiqləyib.
Qeyd edək ki, 2022-ci ildə keçirilmiş məhkəmə prosesində sabiq məmurun 1,437 milyard yuan (təxminən 200 milyon dollar) dövlət vəsaitini təyinatı üzrə xərcləməməsi, 577 milyon yuan (80 milyon dollar) məbləğində nağd pul və hədiyyə qəbul etməsi, 1,055 milyard yuan (147 milyon dollar) dövlət vəsaitini mənimsəməsi ilə bağlı təqsiri sübuta yetirilib. Bundan başqa, Li Cienpin onun rəhbərliyi altında olan cinayətkar dəstənin qanunsuz əməliyyatlarını asanlaşdırmaqda günahkar bilinib. Li Cienpin apellyasiya şikayəti versə də, Daxili Monqolustan yüksək məhkəməsi şikayəti rədd edib. Çinin Ali Məhkəməsi isə Li Cienpinə verilmiş cəzanı qüvvədə saxlayıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
