Çində dünyanın ən böyük elektrikli konteyner gəmisi istifadəyə verilib
Pekin, 16 aprel, AZƏRTAC
Çinin ilk 10 min tonluq təmiz elektrikli konteyner gəmisi kommersiya fəaliyyətinə başlayıb.
AZƏRTAC xəbər verir ki, dünyanın ən böyük elektrik mühərrikli konteyner gəmisi olan "Ning Yuan Dian Kun" Ninbo şəhərindəki limandan Ciasin şəhərinə yola düşüb. Ənənəvi olaraq qazıntı yanacağı ilə işləyən gəmilər tərəfindən xidmət göstərilən bu sıx gəmiçilik marşrutu indi açıq şəkildə elektrikləşdirməyə doğru dəyişir.
Şanxay Ticarət Gəmilərinin Dizaynı və Tədqiqatı İnstitutu mütəxəssislərinin müstəqil şəkildə hazırladığı və tamamilə elektrik mühərrik sistemi ilə təchiz olunmuş gəmi sıfır karbon emissiyası, “ağıllı” idarəetmə və yüksək səmərəliliyə malikdir. Uzunluğu 127,8 metr, eni 21,6 metr olan gəmi 742 ədəd standart 20 futluq konteyner daşıya bilir.
Ümumi tutumu təxminən 20 min kVt/saat olan 10 batareya ilə təchiz olunub və iki 875 kVt-lıq daimi maqnitli sinxron mühərriklə işləyir. Karbon qazı tullantılarını ildə 1462 ton azaldacaq və istismarı boyunca sıfır tullantı, sıfır səs-küy və sıfır çirklənmə əldə edəcək.
Gəmi “ağıllı” naviqasiya və mühərrik sistemləri ilə təchiz olunub ki, bu da avtonom şəkildə toqquşmanın qarşısını almağa, yüksək dəqiqlikli izləməyə və inteqrasiya olunmuş “gəmi-sahil-bulud” nəzarətinə imkan verir. Onun “qardaşı” - "Ning Yuan Dian Peng" mayda dəniz sınaqlarını başa vurduqdan sonra iyunda təhvil veriləcək.
Bölmənin digər xəbərləri
