Çində koronavirusa ümumilikdə 80026 yoluxma halının təsdiqləndiyi müəyyən edilib
Bakı, 2 mart, AZƏRTAC
Bu gün Çin Xalq Respublikasının Səhiyyə İşləri üzrə Dövlət Komitəsində bazar günü ərzində koronavirusa 202 yeni yoluxma halının təsdiqlənməsi, həmçinin 42 nəfərin ölməsi barədə məlumat aldıqlarınn bəyan ediblər. AZƏRTAC “Sinxua”ya istinadla bildirir ki, qeydə alınan yeni ölüm hallarının hamısı Xubey əyalətində müşahidə edilib.
Komitədə bildiriblər ki, bundan əlavə, bazar günü koronavirusa yoluxma ehtimalı ilə 141 yeni pasiyent qeydə alınıb.
Həmin gün xəstəxanalardan COVID-19 virusundan sağalan 1837 pasiyent evə buraxılıb, eyni zamanda, ağır xəstələrin sayı 255 nəfər azalaraq 7110 nəfər təşkil edib.
Bazar gününün sonuna Çində (Syanqan, Aomen və Tayvanın göstəriciləri nəzərə alınmadan) ümumilikdə 80026 təsdiqlənmiş yoluxma halı aşkarlanıb. Bununla yanaşı, xəstələrin 32 min 652 nəfəri hələ də müalicə alır, 44 min 462 pasiyent sağalmadan sonra xəstəxanalardan evə buraxılıb, 2912 nəfər isə xəstəliyin qurbanına çevriliblər.
Komitədə əlavə ediblər ki, yeni koronavirusa mümkün yoluxma halının sayı 715 nəfər təşkil edib.
Xəstəliyə yoluxanlarla sıx əlaqədə olan 46 min 219 nəfər tibbi nəzarət altındadır. Bazar günü 8 min 154 nəfər tibbi müşahidədən azad edilib.
Bazar gününün sonuna Syanqan, Aomen xüsusi inzibati rayonlarında və Tayvanda koronavirusa müvafiq olaraq 98, 10 və 40 yoluxma halı təsdiqlənib. COVID-19 virusundan Syanqanda iki, Tayvanda isə 1 nəfər dünyasını dəyişib.
Syanqan, Aomen və Tayvanda müvafiq olaraq 36, 8 və 12 pasiyent sağalaraq xəstəxanadan evə buraxılıb.
Bölmənin digər xəbərləri
