ÇXR PARLAMENTİNİN YENİ RƏHBƏRLİYİ AZƏRBAYCANLA MÜNASİBƏTLƏRƏ BÖYÜK ƏHƏMİYYƏT VERİR
Milli Məclisin sədri Murtuz Ələsgərov Çin xarici işlər nazirinin müavini Lyu Quçanı qəbul etmişdir. Görüş zamanı Azərbaycan-Çin parlamentlərarası əlaqələrinin və ümumən, dövlətlərarası münasibətlərin daha da dərinləşdirilməsi perspektivləri müzakirə olunmuşdur.
Səmimilik şəraitində keçən söhbət zamanı tərəflər Azərbaycan-Çin münasibətlərinin hazırkı vəziyyətindən razı qaldıqlarını bildirdilər. Parlamentin sədri ölkələrimizin dövlət rəhbərlərinin görüşlərindən danışaraq, bunların həm siyasi, həm də iqtisadi münasibətlərin inkişafına kömək etdiyini vurğuladı. Murtuz Ələsgərov parlamentlərarası əlaqələrin kifayət qədər yüksək olduğunu və Azərbaycanın Milli Məclisinin Çin parlamenti ilə gələcəkdə də fəal əməkdaşlığa hazır olduğunu söylədi.
Cənab Lyu Quçan bildirdi ki, parlament deputatlarının tez-tez görüşməsi çox vacibdir və Çin parlamentinin yeni rəhbərliyi Azərbaycanın qanunvericilik orqanı ilə daha sıx əməkdaşlığa səy göstərir. Başlıcası budur ki, dövlətlərimiz arasında qarşılıqlı etimad və hörmət var. Təsadüfi deyil ki, Azərbaycan rəhbərliyi Tayvan məsələsində ÇXR-in mövqeyini dəstəklədiyini dəfələrlə bəyan etmişdir. Çin də Azərbaycanın ərazi bütövlüyünü müdafiə edir və onun bərpa olunmasına dair Azərbaycan dövlətinin hər hansı qərarına hörmətlə yanaşacaqdır.
Murtuz Ələsgərov Ermənistan-Azərbaycan, Dağlıq Qarabağ münaqişəsi barədə qonağa ətraflı məlumat verdi, problemin həlli məsələsində ölkəmizin ədalətli mövqeyini dəstəklədiyinə görə Çin rəhbərliyinə və xalqına təşəkkürünü bildirdi.
Qəbulda Çinin Azərbaycandakı səfiri Çjan Siyun iştirak edirdi.
Bölmənin digər xəbərləri
