Cinayət mühakiməsi sahəsində əməkdaşlığın möhkəmlənməsi və qarşılıqlı yardımın genişlənməsi məsələləri müzakirə ediləcək
Minsk, 18 noyabr, Zeynal Ağazadə, AZƏRTAC
Noyabrın 18-19-da Minskdə, MDB İcraiyyə Komitəsində Birliyin iştirakçısı olan ölkələrin azadlıqdan məhrumetmə ilə bağlı olmayan cəzalara məhkum edilmiş şəxslər barəsində məhkəmə qərarlarının icrası haqqında Konvensiya layihəsinin razılaşdırılması üzrə ekspert qrupunun iclası keçiriləcək. Bu barədə AZƏRTAC-a qurumun Minskdəki mətbuat xidmətindən məlumat veriblər.
Sənəd beynəlxalq əməkdaşlığın daha da möhkəmlənməsi və cinayət mühakiməsi sahəsində qarşılıqlı yardımın dövlət suverenliyinə hörmət və dövlətin daxili işlərinə qarışmamaq prinsipləri əsasında genişlənməsinə yönəldilib.
Konvensiya ölkələrin hökmün çıxarıldığı dövlətdə azadlıqdan məhrumetmə ilə bağlı olmayan cəzalara və cinayət-hüquq xarakterli tədbirlərə məhkum edilmiş xarici vətəndaşlar və vətəndaşlığı olmayan şəxslər barəsində məhkəmə qərarlarının icrası üzrə münasibətlərini tənzimləyəcək. Məhkəmə qərarının qəti olması və qanuni qüvvəyə minməsi əsas şərtdir.
Sənəddə hökmün başqa ölkəyə ötürülməsi barədə sorğuların istiqaməti və icrası qaydaları, hökmün icra olunduğu ölkə qarşısında duran öhdəliklər, habelə başqa ölkəyə ötürülən hökmlərə yenidən baxılması, əfv və amnistiya qaydaları şərtləşdirilib.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
