COVID-19: Fransada son sutkada 18 mindən çox yeni yoluxma qeydə alınıb
Paris, 18 dekabr, AZƏRTAC
Fransada COVID-19 infeksiyasına son sutkada 18 254 yeni yoluxma və 261 ölüm faktı qeydə alınıb.
AZƏRTAC xəbər verir ki, bu haqda Fransa Səhiyyə İdarəsi məlumat yayıb.
Bildirilib ki, epidemiya başlayandan ölkədə 2 427 316 sakin koronavirusa yoluxub. Ölkədə 2 523 qrup yoluxması tədqiq edilməkdədir. Pandemiya qurbanlarının sayı 59 619-a çatıb. Xəstəxanalarda 25 182 xəstə müalicə alır. Reanimasiya şöbələrində 2 808 ağır vəziyyətdə koronavirus xəstəsi intensiv müalicə alır. Son 24 saatda reanimasiya şöbələrinə 150 yeni ağır xəstə daxil olub.
“Virus bizimlə səyahət edir, ona yaxınlarımıza yoluxmaq imkanı verməyək”,- deyə Səhiyyə İdarəsinin Baş direktoru fransızları Milad və Yeni il bayramları ilə bağlı ehtiyatlı olmağa çağırıb. O, xəbərdarlıq edib ki, “çox yüksək riskli fəsil - qış fəsli başlayır”.
Fransa mətbuatında Avropa qitəsindəki koronavirusla bağlı ümumi məlumat verilərək yazılıb: “Şərqdə - Azərbaycan və Rusiyaya qədər uzanan Avropa bölgəsindəki 52 ölkə və ərazidə ümumilikdə ən azı 500.069 ölüm qeydə alınıb. Köhnə qitədə ən çox zərbə alan ölkələr arasında Belçika əhalisinin sayına görə ən çox ölüm faktına məruz qalan ölkədir; hər 100.000 əhaliyə 158 ölüm düşüb. Belçikadan sonra siyahıda İtaliya, Bosniya və Herseqovina və Sloveniya gəlir”.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
