Culfada kitabxanaçılar arasında bilik yarışı keçirilib
Culfa, 2 mart, AZƏRTAC
Culfa şəhərindəki 3 nömrəli tam orta məktəbdə rayon Təhsil Şöbəsinin təşkilatçılığı ilə Naxçıvan Muxtar Respublikası Ali Məclisi Sədrinin 2017-ci il 28 avqust tarixli “Oxunması zəruri olan kitablar haqqında” Sərəncamı ilə bağlı rayonun ümumtəhsil məktəblərinin kitabxanaçıları arasında bilik yarışı təşkil olunub.
AZƏRTAC xəbər verir ki, yarışda 27 kitabxanaçı biliyini nümayiş etdirib. Hər bir kitabxanaçıya oxunması zəruri olan kitablarla bağlı 20 sual təqdim olunub. Yarış iştirakçıları hər sualı 1 dəqiqə vaxt ərzində cavablandırıblar.
Yarışın yekun nəticəsinə görə, Qızılca kənd tam orta məktəbin kitabxanaçısı Arzu Həsənova birinci, Əlincə kənd tam orta məktəbin kitabxanaçısı Vüsalə İsgəndərova ikinci, Culfa şəhər 3 nömrəli tam orta məktəbin kitabxanaçısı Fatma Nəzərova üçüncü yerə layiq görülüblər.
Qaliblərə rayon Təhsil Şöbəsinin diplomları və kitablar təqdim olunub.
Bölmənin digər xəbərləri
