Dağlıq Qarabağın önəmi: milli qürur, ədalət və beynəlxalq hüquq
Bakı, 2 noyabr, AZƏRTAC
Məlum olduğu kimi, Azərbaycan Respublikasının Prezidenti İlham Əliyev sentyabrın 27-dən Ermənistanın hücumuna cavab olaraq başlayan hərbi əməliyyatların gedişatı ilə bağlı Almaniyanın ARD televiziya kanalının müxbirinə müsahibə verib.
AZƏRTAC Milli Məclisin deputatı Şahin Seyidzadənin müsahibə ilə bağlı qeydlərini təqdim edir.
Deputat bildirir ki, müsahibədə səsləndirilən sual və cavabları bir neçə hissəyə bölmək olar:
“Hazırda nə baş verir?”
Dağlıq Qarabağ və ətraf 7 rayon artıq 30 ilə yaxındır ki, Ermənistanın işğalı altındadır və Azərbaycan ərazisində qondarma siyasət yürüdülməkdədir. Məhz bu münaqişənin gedişatında hərbi əməliyyatlar başlanılıb. Cari ildə Ermənistan ordusu tərəfindən 3 dəfə təxribat cəhdləri olub. ARD telekanalının müxbirinin “Kim birinci atəşi açdı” sualının cavabında da Prezident İlham Əliyev qeyd edir: “...onlar təmas xəttinə yaxın yerləşən bəzi şəhər və kəndləri ağır artilleriya bombardmanına tutdular. Biz cavab verdik və bu, belə başlamışdır”.
Münaqişənin gedişində 3 humanitar atəşkəs elan edilib. Sözsüz ki, bunun məqsədi münaqişənin danışıqlar masasında siyasi həllidir. Prezident öz cavablarında qeyd edir: “...bizim üç dəfə atəşkəsə razı olmağımız faktı hərbi toqquşmaları dayandırmaq və bu məsələni danışıqlar masasında, siyasi yolla həll etmək iradəmizi nümayiş etdirir. Lakin Ermənistan üç dəfə atəşkəsi kobud şəkildə pozmuşdur”. Artıq sual yarandıqda ki, “Bu humanitar atəşkəs kim tərəfindən pozulur”, onun cavabı məlumdur.
Müsahibəni başlayan zaman verilən sualların cavablarında Prezident İlham Əliyev münaqişənin tarixçəsini, hərbi əməliyyatların başlanması prosesini və cari vəziyyət haqqında dolğun məlumat verir. Beləliklə də ARD televiziya kanalının tamaşaçılarına hazırda münaqişə gedişatında baş verənlərlə bağlı əsas məqamlar Prezident tərəfindən təqdim olundu.
Dağlıq Qarabağın tarixi və önəmi
ARD kanalının müxbiri müxtəlif “qeyri-müəyyən” mənbələrə istinad edərək Dağlıq Qarabağda uzun müddət yaşamış ermənilərlə bağlı sual səsləndirir. Bu sual Prezident İlham Əliyev tərəfindən konkret formada əsaslar və faktlarla cavablandırılır. Belə ki, Azərbaycan Prezidentinin cavablarında bir neçə məqam xüsusilə qeyd olunub:
- ermənilərin Qarabağa köçürülməsinin 150 illiyi münasibətilə 1978-ci ildə abidə ucaldılıb,
- qondarma Dağlıq Qarabağ dövlətinin paytaxtının adı qədim yox, yeni dövrün dırnaqarası qəhrəmanının adı ilə bağlıdır. “Bu tarix varsa, bəs kökləri və qədim adları haradadır” sualı əmələ gəlir.
Bunun ardınca isə Prezident İlham Əliyev jurnalistin “Nəyə görə Qarabağ Azərbaycan üçün belə önəmlidir” sualını elə müxbirin özünə sual verməklə cavab verir: “Elzas və Lataringe sizin üçün önəmlidir? Bavariya sizin üçün önəmlidir? Yaxud Reyn-Vestfaliya?”. Dövlətimizin başçısının jurnalistə yaxın və doğma olan torpaqları sadalamaqla, Qarabağın Azərbaycan xalqına necə doğma olduğunu aydın şəkildə izah etdi. Bu fikri davam etdirən Prezident İlham Əliyev xüsusilə qeyd edir: “Bu, bizim torpaqdır, beynəlxalq səviyyədə tanınan bizim ərazimizdir... Bu, ədalət məsələsidir, bu, milli qürur məsələsidir və bu, beynəlxalq hüquq məsələsidir”.
Dağlıq Qarabağ münaqişəsində Türkiyənin rolu
Demək olar ki, münaqişə cəbhəsində əməliyyatlar başladıqdan bəri Prezident İlham Əliyevin bütün müsahibələrində türk ordusu və “F-16” təyyarələri mövzusu hallandırılır. Artıq bu məsələ ilə bağlı Azərbaycanın mövqeyinin aydın və şəffaf olduğu məlumdur. Türkiyənin müharibəyə cəlb olunması mövzusuna gəldikdə isə, türk əsgərləri də Azərbaycanda ola bilər. Onlar ölkəmizə təlim məqsədi ilə gəlib. Bu bilinən faktdır ki, iki qardaş ölkə Azərbaycan və Türkiyə hər zaman birgə hərbi təlimlər həyata keçirir. Ümumiyyətlə müsahibənin bu hissəsində Prezident İlham Əliyev qərəzli və təxribat xarakterli sualları cavablandıran zaman əks-suallarla müxbirin özünü cavab verən rolunda çıxış etməyə məcbur edir.
Aparıcı: “Hazırda gəldiyim ölkə - Türkiyə bu hərbi əməliyyatlarda, bu müharibədə Sizin üçün nə dərəcədə əhəmiyyət kəsb edir? Burada türk əsgərləri var idi. Dünən biz onlardan bəziləri ilə söhbət etdik. Onlar Türkiyədən olduqlarını dedilər”.
Cənab Prezident: “Siz əsgərlərlə danışmısınız?”
Aparıcı: “Bəli”
Cənab Prezident: “Döyüş meydanında?”
Aparıcı: “Xeyr, döyüş meydanında yox”.
Cənab Prezident: “Bəs harada?”
Aparıcı: “Bakı şəhərində.”
Cənab Prezident: “Onlar burada, Bakıda döyüşürlər?”
Aparıcı: “Xeyr, xeyr...”
Bu məsələyə də kiçik sual-cavab raundu ilə aydınlıq gətirildi.
Qərəzli sualların layiqli cavabları
Müxbir Prezident İlham Əliyevdən ATƏT-in Minsk qrupuna qulaq asıb-asılmaması ilə bağlı soruşur. Burada isə dövlətimizin başçısı hər zaman olduğu kimi, qətiyyətli və konkret cavabını ortaya qoyur: “Mən hər bir tərəfdaşa qulaq asıram. Lakin bu, mənim qulaq asdıqdan sonra nə etməyimdən asılıdır. Lakin mən qulaq asıram”. Yəni, Azərbaycan Prezidenti bildirir ki, qulaq asmaqdan asılı olmayaraq, qərarlar milli mövqedən irəli gələrək, özü tərəfindən verilir.
Bundan sonra müxbir müsahibə gedişatını təxribat xarakterli növbəti fikirlə davam etdirir: “Onları Rusiya dəstəkləyir?”. Müxbirin bu yanaşmasına Prezident İlham Əliyev yenidən adekvat cavab verərək, onu cavab verən şəxs roluna saldı və müsahibəni yekunlaşdırmağa doğru apardı: “Bu, sizin fikrinizdir?”.
Prezident İlham Əliyevin ARD televiziyasına müsahibəsini təhlil edən zaman bir daha görürük ki, dövlətimizin başçısının möhtəşəm natiqlik bacarığı ilə təxribatçı və qərəzli mövqe sərgiləyən müxbir müsahibənin gedişatında artıq sorğu edən mövqedən cavab verən mövqeyində bir neçə dəfə çıxış etməyə məcbur olundu.
Bölmənin digər xəbərləri
