Danimarkada Xocalı faciəsi qurbanlarının xatirəsi anılacaqdır
Bakı, 21 fevral (AZƏRTAC). Fevralın 26-da Danimarkanın məşhur “Avedovre” kitabxanasında Xocalı faciəsinin 19-cu ildönümü ilə bağlı anma mərasimi keçiriləcəkdir.
AZƏRTAC xəbər verir ki, Danimarkadakı Azərbaycan icmasının təşkilatçılığı ilə keçiriləcək mərasimdə ermənilərin xalqımıza qarşı törətdikləri qanlı cinayətlər barədə ətraflı məlumat veriləcək, XX əsrin ən dəhşətli faciələrindən olan Xocalı soyqırımı haqqında həqiqətlərin dünya ictimaiyyətinə çatdırılmasına dair müzakirələr aparılacaqdır.
Bundan əlavə, tədbir iştirakçılarına Ermənistanın işğalçılıq siyasəti və onun nəticələri barədə ətraflı məlumat veriləcək, ermənilərin Xocalının dinc sakinlərinə qarşı törətdikləri vəhşiliklərindən bəhs edən kitab və bukletlər paylanacaq, hadisənin dəhşətlərini əks etdirən filmlər göstəriləcəkdir.
“Xocalıya ədalət” kampaniyası çərçivəsində keçiriləcək mərasimdə yerli ictimai-siyasi təşkilatların, bir çox dərnəklərin təmsilçiləri, bu ölkədə yaşayan Azərbaycan və türk icmalarının nümayəndələri iştirak edəcəklər.
Bölmənin digər xəbərləri
