Daşkənd Beynəlxalq Məktəbində Birləşmiş Millətlər Təşkilatı Günü münasibətilə xalqların mədəniyyət bayramı keçirilmişdir
Daşkənd, 2 noyabr (AZƏRTAC). Daşkənd Beynəlxalq Məktəbində Birləşmiş Millətlər Təşkilatı Günü münasibətilə xalqların mədəniyyət bayramı keçirilmişdir.
Tədbirdə Daşkənddəki səfirliklərin və mədəniyyət mərkəzlərinin nümayəndələri, valideynlər və jurnalistlər iştirak etmişlər.
Mədəniyyət bayramında ölkəmizi Daşkənddəki Heydər Əliyev adına Azərbaycan Mədəniyyət Mərkəzi təmsil etmişdir.
Əvvəl Azərbaycan haqqında sənədli film nümayiş etdirilmiş, ölkəmizin iqtisadi potensialı və mədəni həyatı haqqında məlumat verilmişdir.
Ölkəmiz üçün ayrılmış guşədə Azərbaycanın dövlət bayrağı, gerbi, dövlət himninin sözləri, ulu öndər Heydər Əliyevin və Azərbaycan Prezidenti İlham Əliyevin fotoşəkilləri, vətənimizin tarixi, mədəniyyəti, etnoqrafiyası, xalçaçılıq sənəti, turizm potensialını əks etdirən kitablar, broşür və disklər nümayiş etdirilmişdir.
Mədəniyyət bayramında müxtəlif xalqların mahnı və rəqsləri ifa olunmuşdur. “Azərbaycan qızları” ansamblının ifasında milli rəqslərimiz rəğbətlə qarşılanmışdır.
Xatırladırıq ki, Beynəlxalq Məktəbdə 40-dan artıq xalqın nümayəndəsi ingilis dilində təhsil alır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
