Daşkənddə keçirilən rəsmi qəbulda Azərbaycan Xalq Cümhuriyyətinin tarixindən və gördüyü işlərdən danışılıb
Daşkənd, 27 may, AZƏRTAC
Azərbaycanın Özbəkistandakı səfirliyi 28 May - Respublika Günü ilə əlaqədar rəsmi qəbul təşkil edib.
Qəbulda Özbəkistan Baş nazirinin müavini Uluqbek Ruzikulov, dövlət qurumlarının, ictimai təşkilatlarının rəhbərləri, tanınmış ziyalılar, səfirlər, Azərbaycan diasporunun üzvləri, jurnalistlər iştirak ediblər.
Mərasim Azərbaycanın və Özbəkistanın dövlət himnlərinin səslənməsi ilə başlayıb.
Azərbaycanın Özbəkistandakı səfiri Hüseyn Quliyev Azərbaycan Xalq Cümhuriyyətinin mövcud olduğu 23 ay ərzində dövlət quruculuğu və demokratik dəyərlərin tətbiqi, ordu quruculuğu sahəsində görülən işlər haqqında məlumat verib.
Səfir 1991-ci ildə müstəqilliyini bərpa etmiş Azərbaycanın qazandığı uğurlar, müstəqilliyimizin möhkəmlənməsində ulu öndər Heydər Əliyevin müstəsna xidmətləri haqqında danışıb, onun müasir dövlətçiliyimizin memarı olduğunu vurğulayıb.
H.Quliyev Azərbaycan Prezidenti İlham Əliyevin rəhbərliyi ilə ölkəmizdə həyata keçirilən quruculuq işləri və bütün sahələrdə aparılan islahatlar haqqında məlumat verib. Diplomat deyib ki, son bir neçə ildə Azərbaycan iqtisadiyyatı üç dəfə artıb, ölkəmizin valyuta ehtiyatı 2013-cü ilin əvvəllərində 50 milyard dollardan artıq olub.
Qeyd edilib ki, son 15 ildə Azərbaycan iqtisadiyyatına 100 milyard dollar sərmayə qoyulub və bunun da əksəriyyəti daxili sərmayədir. Bu gün Azərbaycan özü xarici ölkələrə sərmayə qoyan ölkəyə çevrilib. Belə ki, Azərbaycan Rusiya, Türkiyə, Ukrayna, Moldova, Gürcüstan, Latviya və digər ölkələrə milyardlarda dollar sərmayə qoyur. Səfir Azərbaycanın özünün “Azərspace-1” telekommunikasiya peykini orbitə buraxdığını qonaqların diqqətinə çatdırıb.
Ermənistan-Azərbaycan, Dağlıq Qarabağ münaqişəsi haqqında məlumat verən diplomat problemin sülh yolu ilə həlli istiqamətində ölkəmizin təşəbbüslərindən söhbət açıb. O, münaqişənin həllində Azərbaycan Prezidenti İlham Əliyevin qətiyyətli mövqe tutduğunu vurğulayıb. Diplomat deyib ki, Ermənistanın təcavüzkar siyasəti regionda sülhün və sabitliyin inkişafına təhlükə yaradır. BMT Təhlükəsizlik Şurası Ermənistanın işğal etdiyi Azərbaycan torpaqlarından qeyd-şərtsiz çıxarılması ilə bağlı dörd qətnamə qəbul edib. ATƏT, Avropa Şurası, NATO, İslam Əməkdaşlıq Təşkilatı və digər nüfuzlu beynəlxalq təşkilatlar da belə qərarlar qəbul edib, ancaq hələ də Ermənistan bu sənədlərə məhəl qoymur.
Diplomat xatırladıb ki, bu il mayın 8-də MDB dövlət başçılarının Moskvada keçirilən Zirvə görüşündə Özbəkistan Prezidenti İslam Kərimov bildirib ki, ayrı-ayrı dövlətlərin BMT və digər beynəlxalq təşkilatların qərarlarını yerinə yetirməməsi bu qurumların nüfuzunu və səlahiyyətlərini şübhə altına salır. Bu da arzuolunmaz nəticələrə gətirib çıxara bilər.
H.Quliyev Azərbaycanın enerji layihələri, Xocalı soyqırımı, ölkəmizdə keçirilən beynəlxalq əhəmiyyətli tədbirlər haqqında da məlumat verib.
Sonra qonaqlara ziyafət verilib.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
