Daşkənddə Xocalı soyqırımı qurbanlarının xatirəsi anılacaqdır
Daşkənd, 16 fevral (AZƏRTAC). Azərbaycanın Özbəkistandakı səfirliyindən verilən məlumata görə, Daşkənddə Xocalı faciəsinin 20-ci ildönümü ilə əlaqədar anma tədbirləri keçiriləcəkdir.
Fevralın 26-da Daşkənddəki Heydər Əliyev adına Azərbaycan Mədəniyyət Mərkəzində keçiriləcək mərasimdə Özbəkistanın ədəbiyyat, mədəniyyət və incəsənət xadimləri, diaspor təşkilatlarımızın üzvləri, jurnalistlər iştirak edəcəklər.
Azərbaycanın Özbəkistandakı müvəqqəti işlər vəkili Akif Əliyev Xocalı faciəsi haqqında ətraflı danışacaqdır.
Anma mərasimində Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət” beynəlxalq kampaniyasının gedişi haqqında məlumat veriləcəkdir.
Tədbir çərçivəsində “Məhv olmuş şəhər” sənədli filmi və “Xocalıya ədalət” rep-klipi nümayiş etdiriləcək, faciəni əks etdirən fotoşəkillərdən ibarət sərgi təşkil olunacaqdır.
Səfirliyin ikinci katibi Səbuhi Əhmədovun verdiyi məlumata görə, Xocalı faciəsi ilə bağlı məlumatlar toplusu Özbəkistanın Xarici İşlər Nazirliyinə, Dostluq Cəmiyyətləri Şurasının idarə heyətinə, ölkədə fəaliyyət göstərən səfirlik və beynəlxalq təşkilatlara, həmçinin elm ocaqlarına göndəriləcəkdir.
Xocalı faciəsinin 20-ci ildönümü əlaqədar Daşkənddəki Respublika Azərbaycan Mədəniyyət Mərkəzində də tədbir keçiriləcəkdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
