İQTİSADİYYAT
Dəmir yolu ilə daşınan idxal-ixrac yüklərinin həcmində artım var
Bakı, 17 oktyabr, AZƏRTAC
“ADY Konteyner” MMC bu ilin 9 ayı ərzində konteynerlərlə daşınan idxal və ixrac yüklərinin həcmində artıma nail olub.
AZƏRTAC xəbər verir ki, “Azərbaycan Dəmir Yolları” QSC-nin törəmə şirkəti olan “ADY Konteyner” MMC 2023-cü ilin 9 ayı ərzində konteynerlərlə idxal yüklərinin nəqli 8 059 TEU təşkil edib. Qeyd edək ki, 2022-ci ilin eyni dövründə isə bu göstərici 5 356 TEU olub. İdxal rejimində konteynerlərlə yükdaşımalarda 50 faiz artım qeydə alınıb. İdxal olunan yüklərin sırasında əsasən müxtəlif sənaye, kimya sənayesi məhsullarını, əlvan metallurgiya, tikinti materialları, nəqliyyat vasitələri və onların ehtiyat hissələrini qeyd etmək olar.
Konteynerlərlə daşınan ixrac yüklərinin nəqlinə gəlincə, bu ilin ilk 9 ayı ərzində “ADY Konteyner” MMC 11 306 TEU yük daşıyıb. 2022-ci ilin eyni dövründə bu rəqəm 4 609 TEU təşkil edib. Bu da 145 faiz artım deməkdir. Nəql olunan ixracyönümlü yüklər sırasında əlvan metallurgiya, sənaye, kimya sənayesi məhsulları üstünlük təşkil edir.