“Dəmir yumruğ”un gücü – Sevilən Prezidentimiz, Qalib Komandanımız
Bakı, 16 oktyabr, AZƏRTAC
15 oktyabr 2003-cü il - 15 oktyabr 2023-cü il. Düz iyirmi ildir ki, İlham Heydər oğlu Əliyev Azərbaycan Prezidenti kimi ölkəyə rəhbərlik edir. Xalqımızın böyük etimad göstərib prezident seçdiyi İlham Əliyev bu etimadı layiqincə doğrultdu. İlham Əliyev dünyanın qlobal problemlərlə yaşadığı bu qarışıq zamanda özünün yürütdüyü məqsədyönlü daxili və xarici siyasəti ilə Azərbaycanımızın dünya dövlətləri cərgəsində nüfuzlu yeri olduğunu göstərən böyük dövlət xadimi və qalib sərkərdədir! Onun 15 oktyabr 2023-cü ildə - prezidentlik fəaliyyətinin 20-ci ildönümündə Xankəndidə üçrəngli Dövlət Bayrağımızı ucaltması və xalqa müraciəti Azərbaycan və dünya tarixində şərəfli bir missiyanı uğurla tamamlamasının sübutudur. Bu tarix həm də 218 illik işğalın sonu deməkdir! “Xalqa xidmət etmək mənim ən böyük vəzifəmdir” deyən Prezident İlham Əliyev sözün əsl mənasında sözünə əməl etdi, düşmən əsarətində qalan cənnət Qarabağımızı Ali Baş Komandan kimi işğalçılardan azad etdi.
Bunu AZƏRTAC-a açıqlamasında AMEA Folklor İnstitutunun aparıcı elmi işçisi filologiya üzrə fəlsəfə doktoru, dosent Şakir Albalıyev söyləyib. O bildirib ki, müasir müstəqil Azərbaycanın qurucusu olan Ulu Öndər Heydər Əliyevin Vətənimizi azad görmək üçün başladığı işləri həm oğul kimi, həm də siyasi varis kimi Prezident İlham Əliyev uğurla davam etdirdi və şərəflə sona yetirdi. Əbəs deyil ki, dövlətimizin başçısı 44 günlük şanlı Zəfər savaşından sonra Ulu Öndərin məzarı üstünə gələrək “xoşbəxtəm ki, ata vəsiyyətini yerinə yetirdim” dedi. Bu cümlənin məntiqindən çıxan əsas fikir budur ki, Ulu Öndər doğma övladı və siyasi varisi kimi ölkəmizi işıqlı gələcəyə çıxarmaq, Qarabağımızı işğalçılardan azad etmək üçün qurduğu planları və ideyaları ona çatdırıbmış. Atasının və xalqının ona bəslədiyi etimadı bu 20 ildə öz əməli fəaliyyəti ilə doğruldan Prezidentimiz bu gün xalqın sonsuz sevgisini qazanmış liderdir.
“2020-ci ilin 27 sentyabrında başlanan Vətən müharibəsi Prezident və Ali Baş Komandan kimi İlham Əliyevin “Dəmir yumruğ”unun hansı gücə qadir olduğunu bütün dünyaya göstərdi. O “Dəmir yumruq” təkcə fiziki güc olaraq deyil, mənəvi güc kimi də bir sıra məqamlarda siyasi təsir gücünü göstərdi. Cəbhə zonasında düşmənin başına enən “Dəmir yumruq” fiziki olaraq düşmən ordusunu darmadağın etdi. Müharibə gedə-gedə KİV-ə müsahibələr verən dövlətimizin başçısının bəzi bədnam ölkələrin jurnalistlərinin qərəzli suallarına dərin məntiqlə verdiyi cavablar da “Dəmir yumruğa” dönüb onların miskin başlarını əzdi, məkrli mövqe tutanların cılız beyinlərini əzib iflic etdi”, - deyə alim bildirib.
Ş.Albalıyev əlavə edib ki, Xankəndi ilə yanaşı, Xocalı, Xocavənd, Əsgəran, Ağdərə və Sərsəng su anbarında Dövlət Bayrağımızı ucaldan Ali Baş Komandanımız bununla Qarabağımızın tam azad olunduğunu bütün dünyaya bəyan etdi. Öz sözünü və gücünü diktə etməyi bacaran siyasi dövlət xadimi, xalqının və dövlətinin sevilən prezidenti kimi adını tariximizin və dünya tarixinin səhifələrinə qızıl hərflərlə yazdırdı. Bu möhtəşəm Zəfəri ilə o, Prezident kimi öz xalqının xoşbəxt gələcəyinin qarantı olduğunu sübut etdi. Bu misilsiz parlaq Qələbə ilə o, təkcə bədnam qonşularımız olan erməniləri və Ermənistanı məğlub etmədi, həm də düşmənlərimizin havadarlarını - onlara pul, kapital yatıran milyonçu mafiya qruplaşmalarını və həmçinin ermənilərə züy tutan, qahmar çıxan ikiüzlü, haqsız nəhəng dövlətləri məğlub etdi. “Dəmir yumruq” döyüş meydanında düşmənlərimizi cismən əzib məhv etdiyi kimi, informasiya cəbhəsində də haqsız düşmənlərimizin tərəfdaşlarının arxasını yerə vurdu.
Bölmənin digər xəbərləri
