Deputat: Azərbaycana qarşı mənfi davranışlar Fransanın beynəlxalq nüfuzuna xələl gətirib
Bakı, 5 yanvar, AZƏRTAC
Ötən il dekabrın 20-21-də Fransa və Ermənistan azərbaycanlıların Laçın yolundakı aksiyası ilə bağlı BMT Təhlükəsizlik Şurasının iclasını çağırdılar. Məlumdur ki, 44 günlük Vətən müharibəsi vaxtı da belə cəhdlər olmuşdu. Həmçinin bu iki ölkə hələ 2022-ci ilin sentyabrında baş vermiş məlum hadisələrlə bağlı BMT-də sənəd qəbul etmək istəyirdi. O zaman buna nail ola bilmədilər. Ötən ilin sonunda bu planlardan biri də BMT Təhlükəsizlik Şurasında dekabrdakı müzakirələrin yekunu olaraq Azərbaycana qarşı əvvəlcə bəyanatın, daha sonra isə qətnamənin qəbul edilməsi idi. Lakin bu baş tutmadı. Belə ki, Böyük Britaniya, Rusiya, BƏƏ və Albaniya Fransa tərəfindən hazırlanan bəyanata düzəlişlər etməyi istədilər, sonda bu ölkələrin qəti mövqeyi nəticəsində yekun mətn qəbul olunmadı.
Bu fikirləri AZƏRTAC-a açıqlamasında Milli Məclisin deputatı Anatoliy Rafailov söyləyib.
Deputat xatırladıb ki, Azərbaycanın xarici işlər naziri Ceyhun Bayramovun Ermənistanın qeyri-qanuni fəaliyyəti ilə əlaqədar Laçın yolu ətrafında yaranmış vəziyyətlə bağlı BMT Baş katibinə ünvanlandığı məktub Təhlükəsizlik Şurasının sənədi kimi yayılıb. Adıçəkilən məktubda Laçın yolunda azərbaycanlı fəalların Rusiya sülhməramlı kontingentinin müvəqqəti yerləşdiyi ərazilərimizdə qeyri-qanuni iqtisadi fəaliyyətinə qarşı etirazlarının Ermənistan tərəfindən “humanitar böhran” kimi qələmə verilməklə siyasiləşdirilməsi cəhdlərinə diqqət çəkilib. Həmçinin Azərbaycan ərazilərində faydalı qazıntı yataqlarının qanunsuz istismarı ilə bağlı ətraflı məlumat təqdim edilib.
Deputat diqqətə çatdırıb ki, sənəddə cari il dekabrın 3-dən başlayaraq Azərbaycanın dövlət qurumlarının nümayəndələrinin faydalı qazıntı yataqlarının qanunsuz istismarı, bundan irəli gələn ekoloji və digər fəsadlar ilə bağlı sülhməramlı kontingentin komandanlığı ilə danışıqlar aparıb. Əldə edilmiş razılığa baxmayaraq, dekabrın 10-da Azərbaycan nümayəndələrinin sözügedən ərazilərə səfərinə maneə törədildiyi barədə məlumat verilib.
“Sual yaranır: neçə illərdir Minsk qrupunun üç həmsədr dövlətindən biri olan Fransa Ermənistan tərəfindən Azərbaycanın 20 faiz ərazisinin işğal edildiyi, 1992-ci ildə ermənilər tərəfindən Xocalı şəhərində dinc azərbaycanlılara qarşı soyqırımı törədildiyi, BMT Təhlükəsizlik Şurasının 4 qətnaməsi mövcud olduğu halda ötən illər ərzində BMT Təhlükəsizlik Şurası nə üçün Ermənistanın Azərbaycana hərbi təcavüzü ilə bağlı məsələ qaldırmadı, görüş keçirmədi? Yaxud hər-hansı qətnamənin qəbul olunmasını tələb etmədi? Əgər Fransa özünü haqq-ədalət tərəfdarı olan dövlət hesab edirsə, niyə indiyədək bu ədalətsizliyə susub?
Neçə illərdir Minsk qrupu çərçivəsində sülh danışıqlarının niyə nəticə vermədiyi indi aydın oldu. Çünki Fransa kimi ölkə uzun illər bu qrupun üzvü olub. Bütün deyilənlər və faktlar onu göstərir ki, 2022-ci ilin dekabrında BMT-nin TŞ-də bu qətnaməni keçirmək istəyən “haqq-ədalət carçısı” Fransa haqsızdır. O, ədalətin yox, Fransada mövcud olan erməni diasporunun və bundan irəli gələn maraqlarının tərəfdarıdır. Çünki erməni diasporu Fransada keçirilən seçkilərdə kifayət qədər güclü təsir imkanlarına malikdir”, - deyə A.Rafailov vurğulayıb.
Anatoliy Rafailov əlavə edib ki, BMT TŞ-nin bəzi üzvlərinin Azərbaycanın haqlı mövqeyini dəstəkləməsi, əlbəttə, dövlətimizin xarici siyasətinin nailiyyətlərindən biridir. Çünki dünyada siyasi çəkişmələrin həll edildiyi zamanda ölkəmizə qarşı atılan destruktiv addımlardan birinin qarşısı alınıb. Bu, həm də onu göstərir ki, biz beynəlxalq aləmdə, siyasi səhnədə tək deyilik. Bizim beynəlxalq müstəvidə yürütdüyümüz siyasət, uzun illər ərzində apardığımız informasiya müharibəsi, davamlı addımlarımız öz nəticələrini verir. Bu, həm də Azərbaycanın Qoşulmama Hərəkatındakı fəaliyyəti, bu təşkilata üzv ölkələrin haqq işimizə səs verməsi və dəstəyidir. Qeyd olunmalıdır ki, xarici siyasətdə əldə edilən bütün bu nailiyyətlər Prezident İlham Əliyevin həyata keçirdiyi düşünülmüş və strateji siyasi xətti nəticəsində əldə olunub. Əminliklə deyə bilərik ki, ölkəmiz bu siyasi kursla gələcəkdə də yeni-yeni uğurlar əldə edəcək.
“Azərbaycana qarşı mənfi davranışlar Fransanın beynəlxalq nüfuzuna xələl gətirdi. Bütün dünya ictimaiyyəti, BMT-yə üzv dövlətlər də Fransanın necə qərəzli və ədalətsiz olduğunu gördülər”, - deyə deputat vurğulayıb.
Bölmənin digər xəbərləri
