Deputat: Ermənistan iqtisadiyyatı total iflas mərhələsindədir
Bakı, 4 noyabr, AZƏRTAC
İkinci Qarabağ müharibəsinin 39-cu gününü yaşayırıq. Bu müddət ərzində Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu düşmənin layiqli cavabını verir. Sentyabrın 27-dən bu yana işğalçı Ermənistan ordusuna dəyən maddi ziyanın həcmi 3 milyard dollardan artıqdır. Nəzərə alsaq ki, düşmən döyüşlərdə artıq 8 ədəd C-300 zenit-raket kompleksini (ZRK) itirib və onlardan birinin qiyməti 115-160 milyon dollar civarındadır, zənnimizcə, mənzərə tam aydın olar.
Bu fikirlər Milli Məclisin deputatı, YAP Beynəlxalq əlaqələr, mədəniyyətlərarası dialoq və inteqrasiya komissiyasının katibi, siyasi elmlər doktoru, professor Elman Nəsirovun “Müharibənin 39-cu günü: Ermənistan iqtisadiyyatı total iflas mərhələsində” sərlövhəli məqaləsində yer alıb.
Məqalədə deyilir ki, Ermənistanın maliyyə naziri Atom Cancuqazyan bir neçə gün əvvəl bəyan edib ki, müharibənin hər günü Ermənistan iqtisadiyyatı üçün 30 milyon dollara başa gəlir. Onun hesablamalarına görə, Ermənistan iqtisadiyyatına bu 39 gün ərzində 1 milyard 170 milyon dollar zərər dəyib. Süni şəkildə erməni nazir itkilərinin miqyasını kiçiltməyə can atsa da, yuxarıda qeyd etdiyimiz təkcə C-300 ZRK ilə bağlı Ermənistanın üzləşdiyi itkilərin məbləğinin 920-1280 milyon dollar civarında olduğu danılmaz həqiqətdir. Vəziyyətin belə davam etməsinə Ermənistan iqtisadiyyatı tab gətirə biləcəkmi? Cavab birmənalıdır: əsla! Ermənistan iqtisadiyyatının müharibəyə qədər olan vəziyyətinin təhlili bu nəticəyə gəlməyə əsas verir.
Deputat Ermənistan iqtisadiyyatının total iflas mərhələsində olduğunu faktlarla əsaslandırır. O, ilk növbədə, Ermənistanın 2020-ci il üzrə hərbi büdcəsinin 634 milyon dollar olduğunu diqqətə çatdırır: “Müharibənin 39-cu günündə artıq işğalçı dövlətin təkcə hərbi itkilərinin həcmi (3 milyard dollardan artıq) hərbi büdcədən ən azı 4,7 dəfə çoxdur. İkincisi, 2020-ci ilin birinci yarısında Ermənistan iqtisadiyyatının onsuz da ağır olan vəziyyəti daha dramatik hal alıb. Belə ki, həmin dövr ərzində xəzinəyə vergi daxilolmaları 50 faiz aşağı düşüb. İlin sonunadək ölkədə büdcə kəsiri ən optimist proqnozlara görə, 1 milyard dollar təşkil edəcək. Üçüncüsü, 2020-ci ilin iyul ayında Ermənistanın xarici dövlət borcu tarixinin rekord həddinə - 8 milyard dollara çatıb. Bu reallıq fonunda Ermənistanın strateji valyuta ehtiyatları sonuncu dəfə qeydə alınmış 2,6 milyard dollardan 1,5 milyard dollara enib. Lap yaxın günlərdə həndəsi silsilə ilə artan hərbi xərclərin bu “valyuta”nı tam “yeyəcəyi” aksiom kimi qəbul olunur. Dördüncüsü, “Fitch” Beynəlxalq Reytinq Agentliyi Ermənistanın uzunmüddətli reytinqini aşağı salıb və proqnoz verib ki, bu ilin sonuna ölkəni defolt gözləyir”. Nəhayət, pandemiya Ermənistan iqtisadiyyatının çöküşü prosesinin katalizatoru kimi çıxış edir. Kiçik və orta biznes məhv olmaq mərhələsini yaşayır. Sahibkarlıq subyektləri iflasa uğrayıb. Yoxsulluq və işsizlik dözülməz hal alıb. Ən əsası, insanlar “məğlubiyyət sindromu”nun təsiri altında sabahkı günə inamlarını tam itiriblər. Müharibədə biabırçı məğlubiyyət yaşayan, pandemiyanın cənginə aldığı bu lənətlənmiş ölkəyə heç bir xarici investorun bir sent belə sərmayə qoymayacağı gün kimi aydın həqiqətdir. Erməni lobbi və diasporunun isə məğlub Paşinyan rejimindən üz çevirəcəkləri və deməli, xarici ianələrin artıq Ermənistanın boş xəzinəsinə axmayacağı başqa bir həqiqətdir.
“Bütün bu reallıqlar fonunda Prezident İlham Əliyevin oktyabrın 28-də Rusiyanın “İnterfaks” agentliyinə verdiyi müsahibəsində səsləndirdiyi fikirlər Ermənistanın siyasi-hərbi rəhbərliyi üçün ciddi siqnal və dərs olmalıdır: “Ermənistan başa düşməlidir ki, o, artıq yolun kənarındadır. Artıq ondan ötrü heç kim vuruşmayacaq. Bəs sonra? Azərbaycan Prezidenti diqqətə çatdırdı ki, onların xalqımızın başına gətirdiyi bütün ağrı-acılara və faciələrə baxmayaraq, biz qarşıdurma istəmirik, biz sülh istəyirik, geosiyasi reallıqlar müsbət istiqamətdə inkişaf etməlidir. Ermənistan öz məhvini özü hazırladı. Amma ziyanın yarısından da qayıtmaq mümkündür. Azərbaycan 30 il gözlədi, amma daha gecdir. Biz böyük qələbənin astanasındayıq. Qarabağ Azərbaycandır!”, - deyə deputat vurğulayıb.
Bölmənin digər xəbərləri
