DİN: Bank kartları ilə əlaqəli naməlum zənglərə və mesajlara cavab verməyin!
Bakı, 2 iyun, AZƏRTAC
Mayın 31-də və iyunun 1-də Daxili İşlər Nazirliyinə (DİN) daxil olan müraciətlər əsasında ayrı-ayrı vətəndaşların bank hesablarından 1351, 1323, 1000, 900, 500, 450 və 55 manat məbləğində vəsaitin dələduzluq yolu ilə oğurlandığı müəyyən edilib.
Bu barədə AZƏRTAC-a DİN-in mətbuat xidmətindən məlumat verilib.
“DİN vətəndaşları naməlum nömrələrdən gələn zənglərə və mesajlara qarşı ehtiyatlı olmağa çağırır. Zərərçəkmiş şəxslər naməlum şəxslərə bank kartının nömrəsini, kartın istifadə müddətini, CVV/CVC kodunu (kartın arxa hissəsində yerləşən 3 rəqəmli təhlükəsizlik kodu), mobil nömrəyə SMS vasitəsilə göndərilən birdəfəlik OTP kodlarını veriblər. Bir daha xatırladırıq ki, bank kartları ilə əlaqəli naməlum zənglərə və mesajlara cavab verməyin, danışıq və yazışma aparmayın – dərhal blok edin”, - deyə məlumatda bildirilib.
Bölmənin digər xəbərləri
