Donald Tusk Kiyevə yardıma qarşı çıxan ABŞ senatorlarını tənqid edib
Bakı, 8 fevral, AZƏRTAC
Polşanın Baş naziri Donald Tusk Ukraynaya yardım paketi layihəsinə qarşı çıxan amerikalı respublikaçı senatorları sərt tənqid edib.
AZƏRTAC xəbər verir ki, Polşa hökumətinin başçısı ABŞ Senatında qanun layihəsi üzrə keçirilən prosessual səsvermənin nəticələri barədə fikirlərini bildirib.
“Azadlıq və müstəqilliklərini bərpa etmək üçün milyonlarla insana kömək göstərən Ronald Reyqan bu gün məzarında “tərsinə çevrilir”. Ar olsun sizə”, - Donald Tusk özünün media hesabında belə yazıb.
Qeyd edək ki, fevralın 7-də Ukrayna və İsrailə yardım, həmçinin ABŞ-ın cənub sərhədində nəzarətin gücləndirilməsi ilə bağlı qanun layihəsi Senatda ilk səsvermə prosedurundan keçməyib. Respublikaçı senatorların çoxu sənədin əleyhinə səs verib.
Layihə büdcədən 118 milyard dollardan çox əlavə vəsaitin ayrılmasını nəzərdə tuturdu. Senatorlar həmin vəsaitin 60,06 milyard dollarını Ukraynaya, 14,1 milyard dollarını İsrailə, 20,23 milyard dollarını isə Meksika ilə sərhədin təhlükəsizliyinin təminatına ayrılmasını təklif edirdilər.
Bölmənin digər xəbərləri
