DOST mərkəzlərində vətəndaşlara göstərilən xidmətlər sosial təminat sahəsində yenilikdir
Bakı, 21 may, Səadət Hakıyeva, AZƏRTAC
DOST mərkəzlərinin açılışı dövlətin sosial sahədə apardığı islahatların əyani təzahürü və davamıdır. Burada vətəndaşlara göstərilən xidmətlər sosial təminat sahəsində bir yenilikdir və bir neçə ölkə Azərbaycanın təcrübəsindən yararlanmaq istəyir.
Bu sözləri AZƏRTAC-a açıqlamasında politoloq İlqar Vəlizadə söyləyib.
Azərbaycanda 30-dan çox DOST mərkəzinin fəaliyyət göstərəcəyini nəcib təşəbbüs adlandıran politoloq deyib: “Əlil övladı olan bir valideyn kimi DOST mərkəzinin xidmətlərindən mütəmadi istifadə edirik. Bu, “ASAN xidmət” kimi nümunəvi dövlət qurumlarından biridir. Düşünürəm ki, bir çox qurumlar DOST mərkəzlərinin fəaliyyətindən örnək götürməlidirlər. Belə mərkəzlər xüsusilə, həssas qrupdan olan ailələr üçün böyük köməkdir və onların problemlərinin yüngülləşdirilməsində böyük rol oynayır. Burada vətəndaşlara xidmət çox yüksək səviyyədədir. Sənədləşmə və başqa xidmətlər qısa vaxtda həyata keçirilir. Əlillik qrupuna aid olanlar, pensiya alanlar, şəhid ailələri bu xidmətdən yüksək səviyyədə yararlanırlar. Xidmət personalı vətəndaşlarla çox səbirli, təmkinli davranır, problemləri qayğıkeşliklə dinləyirlər. Bir sözlə, mehriban və nəzakətlidirlər. Təbii ki, bütün bunlar dövlətin apardığı siyasətin nəticəsidir. Vətəndaşlar bu xidmətdən məmnun qalaraq dövlətin başçısına minnətdarlıqlarını ifadə edirlər”.
İ.Vəlizadə diqqətə çatdırıb ki, Azərbaycan sosialyönümlü dövlətdir və bunun əsası ümummilli lider Heydər Əliyev tərəfindən qoyulub və bu gün də uğurla davam etdirilir. Sosial siyasət Azərbaycanın daxili siyasətini müəyyən edən bir kursdur. Azərbaycanda müharibədən əziyyət çəkmiş, öz yaxınlarını itirmiş ailələrin dövlət tərəfindən dəstəklənməsi yüksək səviyyədə həyata keçirilir. Onun sözlərinə görə, bu günə qədər ölkəmizdə 7600 şəhid ailəsi dövlət tərəfindən evlərlə, mənzillərlə təmin edilib. Bu il 1500 şəhid ailəsinə mənzillərin verilməsi nəzərdə tutulur ki, bu da növbədə duran şəhid ailələrinin sayının 2 mindən az olacağı deməkdir. Dövlətin apardığı siyasət nəticəsində maksimum iki il ərzində bütün şəhid ailələri evlərlə təmin ediləcək. Dövlət şəhid ailələrinə və Qarabağ müharibəsi veteranlarına 6 mindən çox minik maşınının verilməsini təmin edib və cari ildə bu qrupdan olan insanlara 400 maşının paylanması planlaşdırılır.
“Azərbaycan Prezidenti İlham Əliyev Azərbaycan Televiziyasına müsahibəsində dövlətin sosial siyasəti, koronavirusla mübarizə sahəsində həyata keçirilən tədbirlər, ölkəmizin beynəlxalq miqyasda gördüyü işlər, dövlətin gənclər siyasəti, informasiya texnologiyaları və innovasiyaların tətbiqi və digər mühüm məsələlər barədə ətraflı danışdı. Dövlətimizin başçısı öz nitqində bildirib ki, koronavirusla bağlı görülən işlər həm Azərbaycan xalqı, həm də beynəlxalq təşkilatlar tərəfindən təqdir olunur. Əlbəttə ki, xalqımız dövlətimizin başçısına minnətdardır ki, bu faciədən az itkilərlə çıxa bildik. Qabaqlayıcı tədbirlər görülməsəydi, bu, mümkün olmazdı. Təsəvvür edin ki, əhalisinin sayı Azərbaycanla eyni olan inkişaf etmiş ölkələrin bəzilərində bu günə qədər pandemiyadan 10 minə yaxın insan vəfat edib. Ölkəmizdə bu xəstəlikdən vəfat edənlərin sayı isə azdır”, - deyə politoloq vurğulayıb.
İ.Vəlizadə diqqətə çatdırıb ki, Azərbaycan hər zaman əməkdaşlığa, inkişafa açıq ölkələrdəndir. Dövlətimiz bunu qlobal pandemiya dövründə də sübut etdi. Azərbaycan Türkdilli Dövlətlərin Əməkdaşlıq Şurasının və Qoşulmama Hərəkatının sədri kimi bu iki təsisatın Zirvə toplantılarını ən yüksək səviyyədə təşkil etdi. Üzv dövlətləri dostluğa, qarşılıqlı dəstəyə və həmrəyliyə dəvət edən Prezident İlham Əliyev dünyaya mesaj verdi ki, çətin şəraitdə panikaya düşmək yox, bir olmaq, irəliyə doğru baxmağı bacarmaq lazımdır. Bir sözlə, Zirvə görüşləri Azərbaycan dünya miqyasında çox böyük hörmətə və yüksək imicə malik olan ölkə olduğunu nümayiş etdirdi.
Politoloq təcavüzkar və qonşu Ermənistanın qeyri-konstruktiv mövqe nümayiş etdirməsindən, bütün beynəlxalq hüquq normalarına məhəl qoymamasından da danışıb. Bildirib ki, Azərbaycan Prezidenti yüksək tribunalardan çıxışlarında işğalçı Ermənistanın iç üzünü açıb göstərir, onun region, ümumilikdə bəşəriyyət üçün nə qədər təhlükəli olduğunu xüsusi vurğulayır. Təəssüflər olsun ki, Azərbaycanın inkişafını gözü götürməyən təcavüzkar Ermənistan işğal olunmuş torpaqlarımızda provakasiya əməllərini davam etdirir. Təbii ki, beynəlxalq hüququ normalarına uyğun olaraq işğalçı Ermənistan yerində oturdulmalı, dünya ictimaiyyəti Ermənistanın təcavüzkar siyasətinə münasibət bildirməlidir.
Bölmənin digər xəbərləri
