Dövlət büdcəsi layihəsinin müzakirələri 6 komitənin birgə iclasında davam etdirilib
Azərbaycan Respublikasının 2015-ci il dövlət büdcəsi haqqında qanun layihəsi və büdcə zərfinə daxil olan digər sənədlərin müzakirələri noyabrın 5-də Milli Məclisin 6 komitəsi - elm və təhsil, hüquq siyasəti və dövlət quruculuğu, regional məsələlər, mədəniyyət, insan hüquqları, beynəlxalq münasibətlər və parlamentlərarası əlaqələr komitələrinin birgə iclasında davam etdirilib.
AZƏRTAC xəbər verir ki, iclası açan Milli Məclisin elm və təhsil komitəsinin sədri Şəmsəddin Hacıyev artıq Azərbaycanda mükəmməl, oturuşmuş bir büdcə institutunun formalaşdığını deyib.
Bildirilib ki, hər zaman olduğu kimi, gələn il də davamlı iqtisadi inkişafın möhkəmləndirilməsi əsas hədəf kimi seçilib. Qarşıya qoyulan hədəflər, ölkənin iqtisadi siyasəti bilavasitə “Azərbaycan 2020: gələcəyə baxış” İnkişaf Konsepsiyasının tələblərinə uyğun olaraq qurulub. Azərbaycanda tam iqtisadi və siyasi sabitlik təmin olunub və bunun nəticəsidir ki, ölkəmiz son illərdə belə yüksək inkişaf tempi ilə irəliləyir.
İclasda çıxış edən maliyyə naziri Samir Şərifov deyib ki, 2015-ci ilin dövlət və icmal büdcələrinin layihəsi Azərbaycan Prezidenti İlham Əliyevin daim diqqətində olan və dövlətimizin başçısının prioritet hədəf kimi müəyyən etdiyi vəzifələrin uğurla və ardıcıl surətdə həyata keçirilməsi, əhalinin sosial müdafiəsinin gücləndirilməsi, respublikamızın hərtərəfli təhlükəsizliyinin təmini üçün maliyyə təminatı yaradır. İqtisadi və sosial islahatlar, qeyri-neft sektorunun inkişafı, eyni zamanda, təhsil, səhiyyə, mədəniyyət və digər sahələrə dəstək verilməsi ənənəvi olaraq gələn ilin büdcəsinin prioritetləri sırasındadır. Bunların təmin olunması üçün lazım olan maliyyə təminatı 2015-ci il dövlət büdcəsində nəzərə alınıb.
Nazir deyib ki, dövlət büdcəsi xərclərində sosial yönümlü xərclərin ümumi çəkisi 27,6 faiz olmaqla bu illə müqayisədə 1,1 faiz artıb. Mütləq ifadədə isə sosial yönümlü xərclərin məbləği 5 milyard 826 milyon manat təşkil edəcək.
Qeyd edilib ki, elm xərclərinə növbəti ilin dövlət büdcəsindən 143 milyon manat vəsait ayrılacaq. Azərbaycanda gələn il dövlət büdcəsi xərclərinin 8,1 faizi təhsil sahəsinə yönəldiləcək. “Azərbaycan Respublikasında təhsilin inkişafı üzrə Dövlət Strategiyası”dan irəli gələn vəzifələrin yerinə yetirilməsi üçün dövlət büdcəsindən 117 milyon manat vəsait ayrılacaq.
Diqqətə çatdırılıb ki, təqaüdlər və sosial müavinətlərin ödənilməsi üçün 1 milyard 845 milyon manat vəsait ayrılıb. Bu, cari illə müqayisədə 1,4 faiz çoxdur. Növbəti ildə sosial ipoteka üçün 50 milyon manat vəsaitin ayrılması nəzərdə tutulub.
Bildirilib ki, elm, təhsil, səhiyyə, mədəniyyət, idman sosial müdafiə və sosial təminat sahələri üzrə proqram və məqsədli tədbirlərin maliyyələşdirilməsi üçün növbəti ilin dövlət büdcəsində 805 milyon manat vəsait nəzərdə tutulub. 2014-2018-ci illəri əhatə edən regionların, 2014-2016-cı illəri əhatə edən Bakı şəhəri və onun qəsəbələrinin sosial-iqtisadi inkişafına dair Dövlət proqramları çərçivəsində zəruri sosial və infrastruktur layihələrinin maliyyələşdirilməsinə dövlət büdcəsinin əsaslı vəsait qoyuluşu xərclərindən iri həcmdə vəsait ayrılacaq. Dövlət əsaslı vəsait qoyuluşu investisiya proqramları xərclərinə 6 milyard 930 milyon manat vəsait ayrılması nəzərdə tutulub.
Sonra büdcə layihəsi ilə bağlı müzakirələr aparılıb. Ombudsman Elmira Süleymanovanın, Milli Məclis sədrinin müavini Bahar Muradovanın da çıxış etdikləri müzakirələr zamanı bildirilib ki, 2015-ci ilin dövlət büdcəsində sosial və müdafiə sahəsinə ayrılan diqqətin davam etdirilməsi, qaçqın və məcburi köçkünlər, hərbi qulluqçular, müharibə əlilləri və şəhid ailələrinin yaşayış səviyyəsinin yaxşılaşdırılması, tibbi, sosial, reabilitasiya sisteminin müasir tələblər səviyyəsində qurulması prioritet hədəflərdir. İqtisadi və sosial islahatlara dəstək, iqtisadi, ərzaq, ekoloji təhlükəsizliyin təmin olunması, investisiya və sosial proqramların, xarici borc və öhdəliklərin yerinə yetirilməsi, qeyri-neft sektorunun inkişafı, ölkənin enerji potensialının gücləndirilməsi və digər sahələr də qarşıya qoyulmuş vəzifələrdir.
Müzakirələrdən sonra büdcə layihəsi parlamentin plenar iclasında baxılmağa tövsiyə olunub.
Bölmənin digər xəbərləri
