Komissiya üzvləri görülən işlərə ümumi qiymət verərək bildirmişlər ki, son illər ərzində Azərbaycan Respublikası Prezidentinin tapşırığı ilə dövlət quruculuğu sahəsində əhəmiyyətli tədbirlər görülmüş və korrupsiyaya qarşı mübarizə sahəsində qətiyyətli addımlar atılmışdır.

Səhiyyə sahəsində görülən tədbirlər barədə məruzə ilə səhiyyə naziri Oqtay Şirəliyev çıxış etmişdir. Nazir səhiyyə sistemindəki problemlərdən, xüsusilə kadr təminatı, tibbi təhsil, tibbi xidmətin keyfiyyəti, dərmanların idxalı və təchizatı ilə bağlı məsələlər haqqında geniş məlumat vermişdir. Ötən müddət ərzində səhiyyə sistemində olan vəzifədən sui-istifadə və dövlət əmlakının mənimsənilməsi, tibb müəssisələrinin fəaliyyətində və əczaçılıq sahəsində olan dözülməz nöqsanlar, lisenziyaların verilməsi zamanı korrupsiya halları ilə bağlı məsələlər müzakirə edilmişdir. Korrupsiya halları ilə bağlı hazırda Səhiyyə Nazirliyi sistemində müvafiq araşdırmaların aparıldığı bildirilmişdir. Səhiyyə naziri son aylar ərzində nazirlikdə əsaslı kadr islahatlarının, struktur dəyişikliklərinin, təşkilati və praktiki tədbirlərin həyata keçirildiyi, yeni xəstəxanaların tikilməyə başlandığı, xəstəxanaların təmir olunduğu və müasir avadanlıqla təmin edildiyi, həkimlərin işə qəbulunun şəffaf əsaslarla həyata keçirildiyi barədə məlumat vermişdir. Həmçinin bildirilmişdir ki, dövlət tibb müəssisələrinin dərman preparatları və tibbi təyinatlı məmulatlarla təmin edilməsi işində ciddi dönüş yaranmış, tibb müəssisələrində pulsuz xidmətin təşkili üçün əsaslı tədbirlər görülmüş, üç xəstəxanada tibbi xidmət tamamilə pulsuz edilmişdir. Komissiya ötən müddət ərzində səhiyyə sistemində korrupsiyanın sistemli xarakter aldığını və mütəşəkkil formada həyata keçirildiyini qeyd etmiş və bu sahədə son aylar görülən tədbirlərin əhəmiyyətini nəzərə alaraq və bu tədbirləri dəstəkləyərək qərara almışdır ki, səhiyyə sistemində başlanmış islahatlar daha intensiv davam etdirilməli, icbari tibbi sığorta haqqında qanunvericilik həyata keçirilməli, həkimlərin statusu qanunvericiliklə müəyyən edilməlidir. Həmçinin dövlət tibb müəssisələrində xidmətin şəffaflığı artırılmalı, maliyyə-təsərrüfat intizamına ciddi riayət olunmalı, lisenziya və icazə verilməsi işi təkmilləşdirilməli, səhiyyə sistemində başlanılmış cinayət işləri üzrə korrupsiya halları tam və hərtərəfli araşdırılmalıdır.

Təhsil sahəsində görülən tədbirlər haqqında təhsil naziri Misir Mərdanov çıxış etmişdir. Nazir təhsil sistemində islahatlardan və həyata keçirilən proqramlardan danışmış və bildirmişdir ki, son il ərzində dövlət tərəfindən təhsil müəssisələrinin idarə edilməsi, onlara maliyyə müstəqilliyinin verilməsi, müasir dərslik siyasəti, müəllim hazırlığı, təhsil müəssisələrinin maddi-texniki bazasının gücləndirilməsi, korrupsiyaya qarşı mübarizə ilə bağlı maarifləndirmə üçün vacib tədbirlər görülmüşdür. Son ildə Azərbaycanda 177 məktəb tikilmiş və bunlardan 132-si Heydər Əliyev Fondunun vəsaiti ilə inşa olunmuşdur. Təhsil sistemində islahatların reallaşması üçün vacib rol oynayan “Təhsil haqqında” yeni qanunun tezliklə qəbul edilməsinin əhəmiyyəti göstərilmişdir. Təhsil işçilərinin hazırlanması, məktəblərin maddi-texniki təminatı, müəllimlərin təyin edilməsi prosesində şəffaflığın olmaması, ali məktəblərin imtahan sessiyalarında rüşvət halları və təhsil işçilərinin maaşları ilə bağlı məsələlər Komissiya üzvləri tərəfindən müzakirə edilmişdir. İclasda təhsil orqanlarında korrupsiya halları ilə bağlı Komissiyaya şikayətlərin daxil olduğu qeyd edilmiş, həmçinin təhsil sahəsində mövcud olan problemlərin həlli üçün təcili tədbirlər görülməsinin zəruri olduğu qeyd edilmişdir. Bildirilmişdir ki, məktəblərdə müəllimlərin məsuliyyəti artırılmalı, şagirdlərin təlim-tərbiyəsi işlərində ciddi dönüş yaradılmalı, bütün sahələrdə şəffaflıq təmin edilməli, valideynlərin və ictimaiyyətin nəzarəti real xarakter daşımalıdır.

Xüsusi qeyd olunmuşdur ki, təhsil sistemində olan nöqsanların səbəblərindən biri də yerli icra hakimiyyəti orqanlarının son vaxtlara qədər məktəbli gənclərin təlim-tərbiyəsi, məktəblərin təmiri, maddi-texniki bazasının möhkəmlənməsi ilə ciddi məşğul olmamasından irəli gəlir. Öz borcunu vicdanla yerinə yetirən müəllimlərin problemləri, məktəb üçün kadrların hazırlanması, onların ehtiyaclarının təminatı və digər məsələlərin həlli bu orqanların diqqətindən kənarda qalmışdır.

Komissiya təhsil sahəsində yeni qanunvericiliyin zəruri olduğunu vurğulayaraq qərara almışdır ki, təhsil sahəsində düşünülmüş ciddi islahatlar həyata keçirilməli, təhsilin keyfiyyəti artırılmalı, yeni metod və texnologiyalardan istifadə olunmalı, korrupsiyaya qarşı mübarizədə qətiyyətli tədbirlər görülməli və konkret nəticələr barədə Komissiyaya məlumatlar təqdim edilməlidir.

Sonra Korrupsiyaya qarşı mübarizə üzrə Dövlət Proqramının yerinə yetirilməsi ilə əlaqədar son altı ay ərzində görülən işlər barədə Komissiya tərəfindən Azərbaycan Respublikasının Prezidentinə təqdim edilən məlumatlarla bağlı müzakirələr keçirilmişdir. Dövlət Proqramının icrası ilə əlaqədar Komissiyanın üzvü Azərbaycan Respublikası Prezidentinin İcra Aparatının Hüquq mühafizə orqanları ilə iş şöbəsinin müdiri Fuad Ələsgərov məlumat vermişdir. Bildirilmişdir ki, ötən müddət ərzində Korrupsiyaya qarşı mübarizə üzrə Dövlət Proqramının icrası ilə əlaqədar və ümumiyyətlə, korrupsiyaya qarşı mübarizə sahəsində əsaslı tədbirlər görülmüşdür. Korrupsiyaya qarşı mübarizə ilə bağlı yeni qanunlar qəbul edilmiş, dövlət idarəetmə orqanlarının fəaliyyəti təkmilləşdirilmiş, dövlət qulluqçularının maaşları artırılmış, dövlət orqanlarında daxili nəzarət qurumlarının fəaliyyəti yenidən qurulmuş, bir çox dövlət qurumlarında daimi fəaliyyət göstərən qaynar xətlər yaradılmışdır. Həmçinin son altı ay ərzində məhkəmə islahatları davam etdirilmiş və yeni hakim seçkiləri keçirilmiş, hüquqi şəxslərin qeydiyyatı xeyli asanlaşdırılmış, əqdlərin bağlanması üzərində notariat nəzarəti təkmilləşdirilmişdir. Buna baxmayaraq, bəzi sahələrdə, xüsusilə dövlət qulluğuna qəbul, şəxslərin informasiya əldə etmək hüququ, vətəndaşların müraciətlərinə baxılması ilə bağlı və bir sıra yerli icra hakimiyyəti orqanları tərəfindən Dövlət Proqramının icrası ilə əlaqədar problemlər olduğu göstərilmişdir. Komissiya qərara almışdır ki, Dövlət Proqramına uyğun olaraq, korrupsiyaya qarşı mübarizə sahəsində tədbirlər davam etdirilməli, həmçinin Komissiyanın təqdim etdiyi məlumatlarda göstərilən nöqsanların aradan qaldırılması üçün aidiyyəti dövlət orqanlarından görülmüş tədbirlər barədə hesabat tələb olunmalıdır.

Sonda Komissiya tərkibində yaradılmış qanunvericiliyin təkmilləşdirilməsi üzrə İşçi qrupun fəaliyyəti ilə əlaqədar İşçi qrupun rəhbəri Səyyad Kərimov məlumat vermişdir. Azərbaycan Hökumətinin, habelə ATƏT, ABA/CEELİ, Avropa Şurası, Transparency İnternational kimi beynəlxalq təşkilatların nümayəndələrindən təşkil edilmiş İşçi qrupda hazırlanmış qanun layihələrinin Komissiyanın müzakirəsinə təqdim edilməsi qərara alınmışdır. İclasda həmçinin Komissiyanın Katibliyinin fəaliyyətinin təşkili və maliyyələşdirilməsi məsələləri müzakirə edilmişdir. İclasın sonunda Komissiya müzakirə edilən məsələlər üzrə qərar qəbul etmişdir.