DÖVLƏT SƏRHƏDLƏRİMİZ ETİBARLI SURƏTDƏ QORUNUR
Son bir ayda 14 halda dövlət sərhədinin pozulmasının qarşısı alınmış, nəticədə 8 İran, 4 Azərbaycan, 4 Gürcüstan, 3 Pakistan və 1 Əfqanıstan vətəndaşı sərhəd pozucusu qismində tutulmuşdur. Sərhəd rejimi qaydalarını pozduqlarına görə 13 nəfər Azərbaycan vətəndaşı saxlanılmışdır.
Həmin müddətdə axtarışda olan 48 şəxs saxlanılmış, 3 ədəd əl qumbarası, 1 avtomat silah və onun sandığı, 1 ov tüfəngi, 1 əl qumbarası partlayıcısı, 1 siqnal tapançası, 1536 müxtəlif çaplı patron götürülmüşdür.
Narkotik vasitələrin qeyri-qanuni dövriyyəsinə qarşı mübarizədə də uğurlu nəticələr əldə olunmuşdur. Ay ərzində sərhədlərimizdən 17,2 kiloqram narkotik maddənin keçirilməsinin qarşısı alınmışdır. İyunun 24-də Lənkəran sərhəd dəstəsinin xidməti ərazisində Astara Rayon Polis Şöbəsinin əməkdaşları ilə birgə Lerik rayonunun Törədi kəndi ərazisindəki zastavanın xidməti sahəsində keçirilən əməliyyat tədbirləri nəticəsində İranın Küləş kənd sakinləri Şabel Miri Kefayət və Şabel Məhəmməd Miri tutulmuşlar. Onlardan 2,5 kiloqram tiryək götürülmüşdür. İyunun 28-də Horadiz sərhəd dəstəsinin xidməti ərazisində MTN-nin Füzuli rayon şöbəsi ilə birgə əməliyyat-axtarış tədbirləri həyata keçirilmiş və “Pusqu” sərhəd naryadı təşkil edilmişdir. İrandan Azərbaycana keçməyə cəhd edən 2 nəfər naməlum şəxsin qarşısını almaq məqsədi ilə sərhəd naryadı “Dayan” komandası vermiş, havaya xəbərdarlıq atəşi açmışdır. Sərhəd pozucuları əllərində olan 2 bağlamanı ataraq geri qaçmışlar. Əraziyə baxış keçirilərkən bağlamalarda 14,7 kiloqram marixuana olduğu müəyyənləşdirilmişdir. Bunlardan əlavə, sərhədyanı rayonların ərazilərində 3,5 hektar sahədən ümumi çəkisi 7 ton 670 kiloqram olan 16 min ədəddən çox yabanı çətənə kolu toplanaraq yandırılmışdır.
Qeyri-leqal miqrasiyaya qarşı mübarizədə 15 Azərbaycan, 4 Honkonq, 3 İran, 1 Türkiyə, 1 İsrail və 1 Malayziya vətəndaşı saxta sənədlə, 6 azərbaycanlı və 1 gürcüstanlı başqasına məxsus sənədlə, müxtəlif ölkələrin 53 vətəndaşı isə sənədləri olmadığına görə saxlanılmışlar.
İranın 8, Türkiyənin 4, Suriyanın 4, Hindistanın 3, Sinqapurun 3, Malavinin 2, Filippinin 2, Kanadanın 1, Həbəşistanın 1, Çinin 1, İordaniyanın 1, Əlcəzairin 1 və Sudanın 1 vətəndaşı vizalarının olmamasına görə saxlanılaraq barələrində müvafiq tədbirlər görülmüşdür.
Ay ərzində qaçaqmalçılığa qarşı mübarizə tədbirləri davam etdirilmiş və nəticədə 900 kiloqram nərə balığının, 34 kiloqram 460 qram qara kürünün, 60 min ABŞ dolları məbləğində 7 adda 29 ədəd qızıl zinət əşyalarının, 619 qutu siqaretin, 2 min 52 butulka müxtəlif növ arağın, 600 kiloqram noxudun, müxtəlif çeşiddə 435 geyim məmulatının və 13 baş qaramalın sərhəddən qeyri-qanuni keçirilməsinin qarşısı alınmışdır.
İyun ayının 27-28-də Dövlət Sərhəd Xidməti Xüsusi Dövlət Mühafizə Xidməti, Fövqəladə Hallar Nazirliyi və Müdafiə Nazirliyi ilə birlikdə “Xəzər dənizinin Azərbaycan Respublikasına mənsub hissəsində sahilə, adalara, neft-qaz ixrac boru kəmərlərinə və neft platformalarına qarşı təhlükə yarandıqda Dövlət Sərhəd Xidməti Xüsusi Dövlət Mühafizə Xidməti, Fövqəladə Hallar Nazirliyi və Müdafiə Nazirliyi ilə qarşılıqlı əlaqədə xidməti-döyüş hərəkətləri, Xəzər dənizində birgə xilasetmə işlərinin aparılması” mövzusunda irimiqyaslı faktiki təlimlər keçirmişdir. Təlimlər uğurla başa çatdırılmış, əsas məqsədlərə tam nail olunmuş, qarşıya qoyulmuş bütün tapşırıqlar layiqincə yerinə yetirilmişdir.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.
Bölmənin digər xəbərləri
