Dövlət Sosial Müdafiə Fondunda 20 Yanvar faciəsinin ildönümünə həsr olunmuş anım mərasimi keçirilmişdir
Bakı, 18 yanvar (AZƏRTAC). Dövlət Sosial Müdafiə Fondunda (DSMF) 20 Yanvar faciəsinin 22-ci ildönümünə həsr olunmuş anım mərasimi keçirilmişdir.
DSMF-nin ictimaiyyətlə əlaqələr sektorundan AZƏRTAC-a bildirmişlər ki, tədbirdə şəhidlərin ruhu bir dəqiqəlik sükutla yad edilmişdir.
Fondun sədri Səlim Müslümov çıxış edərək 20 Yanvarı xalqımızın azadlıq mübarizəsinin qəhrəmanlıq səhifəsi kimi qiymətləndirmişdir. O bildirmişdir ki, faciədən bir gün sonra özünün və ailəsinin həyatı üçün təhlükələrə baxmayaraq, ümummilli lider Heydər Əliyev Azərbaycanın Moskvadakı daimi nümayəndəliyinə gələrək doğma xalqının dərdinə şərik çıxmış, Qanlı Yanvar faciəsini törədənləri cəsarətlə lənətləmiş və hadisəyə siyasi-hüquqi qiymət verilməsini tələb etmişdir. Ümummilli liderimiz Heydər Əliyev xalqın təkidli tələbi ilə hakimiyyətə qayıtdıqdan sonra bu qanlı aksiya öz siyasi-hüquqi qiymətini almış, hadisənin əsl mahiyyəti dünyaya çatdırılmışdır.
S.Müslümov 20 yanvar hadisələrində şəhid olmuş şəxslərin ailələrinin, bu hadisələr zamanı əlil olmuş vətəndaşların dövlətin hərtərəfli qayğısı ilə əhatə olunduğunu diqqətə çatdırmışdır.
Anım mərasimində 20 yanvar hadisələrində əlil olmuş vətəndaşlar, bu hadisələrin canlı şahidləri öz xatirələrini bölüşmüşlər.
Bölmənin digər xəbərləri
