Döyüşən rəssamlar – Muzey Mərkəzində Zəfər Gününə həsr edilmiş tədbir
Bakı, 6 noyabr, AZƏRTAC
Mədəniyyət Nazirliyi, Azərbaycan Televiziyası (AzTV) və Azərbaycan Respublikası Kino Agentliyinin birgə təşkilatçılığı ilə Muzey Mərkəzində 8 Noyabr - Zəfər Gününə həsr edilmiş “Döyüşən rəssamlar” adlı tədbir təşkil olunub.
AZƏRTAC xəbər verir ki, tədbirdə Birinci Qarabağ və 44 günlük Vətən müharibəsində iştirak etmiş rəssam qazilərin döyüş təəssüratlarından ibarət “Kətan, Vətən” adlı sənədli film nümayiş olunub.
“Azərbaycantelefilm” studiyasının istehsalı olan və dörd rəssamın müştərək işini əks etdirən filmdə Birinci Qarabağ müharibəsində döyüşmüş Tərlan Eyvazov və İntiqam Ağayevin, həmçinin Vətən müharibəsində döyüşmüş Cavidan Rəhmətov və Fərid Əhmədovun müharibəyə insani və yarıdıcı yanaşmaları öz əksini tapıb.
“Azərbaycantelefilm” studiyasının rəhbəri Əməkdar incəsənət xadimi Elçin Musaoğlu bildirib ki, bu günə kimi qurum tərəfindən Vətən müharibəsi mövzusunda bir sıra bədii-sənədli filmlər çəkilib. Bu mövzulu ekran əsərlərinin davamı olaraq noyabrın 8-də AzTV-də “O tərəfi kölgə” adlı bədii film nümayiş etdiriləcək.
Çıxışlardan sonra “Kətan, Vətən” filmi nümayiş olunub. Ekran işinin ssenari müəllifi və rejissoru Rövşən Nicat, layihə rəhbəri Elçin Musaoğlu, quruluşçu operatoru Elxan Rüstəmovdur. Film boyu danışılan kövrək xatirələrin, işlənən rənglərin müşayiəti ilə 6 metrlik kətan üzərində çəkilən “Zəfərə gedən yol” adlı rəsm əsəri yaranıb.
İkinci Qarabağ müharibəsinin iştirakçısı, rəssam Fərid Əhmədov AZƏRTAC-a müsahibəsində Füzulidən Şuşaya kimi keçdiyi döyüş yolundan bəhs edib: “Mən dördüncü kursda oxuyanda müharibəyə yollandım. Uzun və çətin bir yol keçərək Şuşaya çata bildik. Alınmaz qalamızı azad etdik”. Müharibədən qayıdandan sonra magistraturaya qəbul olan Fərid sərgidə yer alan “Bizim zaman” əsərini yaradıb. Əsərdə Vətənimizin cəsur döyüşçüləri tərəfindən Azərbaycanın mədəniyyət beşiyi olan Şuşanın azad edilməsi əks olunub.
Vətən müharibəsində iştirak edən Cavidan Rəhmətov Cəbrayıl, Xocavənd istiqamətlərində döyüşüb. Hazırda heykəltaraş işləyən Cavidan müharibə mövzusuna həsr olan əsərlər üzərində çalışdığını söyləyir. Sərgidə yer alan “Zəfər yolu” əsəri haqqında danışan C.Rəhmətov bildirib ki, kompozisiya 1 həftə ərzində ərsəyə gəlib: “Əsərin ön tərəfi 2020-ci il - Zəfərə gedən yoldan bəhs olunur, arxa tərəfində isə 1992-ci ildə məcburi köçkünlərin üzləşdiyi əziyyət, onlara verilmiş işgəncələr əks olunub”.
Birinci Qarabağ müharibəsi qazisi, rəssam İntiqam Ağayevin sərgidə 18 əsəri təqdim olunub. “Rəsmlərin əksəriyyəti Birinci Qarabağ müharibəsinə həsr olunub. Onların sırasında Aprel döyüşlərinə, Milli Qəhrəman Mübariz İbrahimova həsr olunan əsərlər var. Bu rəsmlər gənclərə vətənpərvərlik ruhunun aşılanmasında, gələcək nəsillərə bu ideologiyanın ötürülməsində böyük rol oynayır”, - deyə o bildirib.
Sərgidə Tərlan Eyvazov, İntiqam Ağayev, Cavidan Rəhmətov, Fərid Məmmədovla yanaşı, Pəri Əsgərova və Fəxri Musazadənin ümumilikdə 55 əl işi nümayiş etdirilib.
Bölmənin digər xəbərləri
