DREZDENDƏ ALTERNATİV ENERJİ MƏNBƏLƏRİNİN İNKİŞAFINA DAİR BEYNƏLXALQ KONFRANS ÖZ İŞİNƏ BAŞLAMIŞDIR
Forumun təşkilat mərkəzindən verilən məlumata görə, Avropa İttifaqının bilavasitə himayəsi, Almaniya hökuməti, federal iqtisadi inkişaf və ekologiya nazirliklərinin dəstəyi ilə keçirilən beynəlxalq konfransın işində dünyanın 80-dək ölkəsindən 2500 nümayəndə, o cümlədən BMT, Avropa İttifaqı və digər beynəlxalq qurumların iqtisadiyyat, sənaye, elm və texnika sahəsində ekspertləri iştirak edirlər.
Sentyabrın 9-dək beş gün davam edəcək beynəlxalq konfrans çərçivəsində alternativ enerji hasilatı mexanizm və qurğuları sistemlərinin, o cümlədən enerji hasilatı mənbələrinin coğrafi-strateji, iqtisadi-ekoloji amillərinin daha da təkmilləşdirilməklə yeniləşdirilməsi məsələləri ətrafında məsləhətləşmə və müzakirələr diqqət mərkəzində olacaqdır. 1000-dən artıq ixtiraçı-referent dünyada, o cümlədən Avropa məkanında alternativ enerji istehsalı və istehlakı sahəsində əməkdaşlığın perspektivləri ətrafında məsləhətləşmələr və təcrübə mübadiləsi aparacaqlar.
Konfransla eyni zamanda təşkil olunmuş alternativ enerji sənayesi sərgisində dünyanın 30 ölkəsindən 400-ə qədər müəssisə, firma və şirkət yeni məhsullarını – istehsal qurğularını, mexanizm və digər avadanlıqları nümayiş etdirirlər.
Forumun açılış mərasimində xüsusilə qeyd olunmuşdur ki, Almaniya alternativ enerji sənayesi sahəsində dünyanın ən öncül ölkəsidir. Ölkə 2000-2006-cı illər müddətində alternativ enerji sənayesi sahəsində bazaryönümlülük payını 5 faizdən 20 faizə qaldırmışdır.
Bölmənin digər xəbərləri
