Dünya azərbaycanlıları 20 yanvar şəhidlərinin xatirəsini yad edir
Bakı, 18 yanvar (AZƏRTAC). Dünyanın müxtəlif ölkələrində yaşayan soydaşlarımız 20 Yanvar faciəsi qurbanlarının xatirəsini yad edirlər.
Diasporla İş üzrə Dövlət Komitəsindən AZƏRTAC-a bildirmişlər ki, Rusiya Federasiyasının Moskva, Sankt-Peterburq, Yekaterinburq və digər şəhərlərində Ümumrusiya Azərbaycan Konqresi, Rusiyanın Azərbaycanlı Gənclər Təşkilatı və digər təşkilatların iştirakı ilə keçiriləcək konfrans, “dəyirmi masa” və seminarlarda xalqımızın tarixinə həm faciə, həm də qəhrəmanlıq salnaməsi kimi həkk olunmuş 20 Yanvar hadisələri təhlil olunacaqdır.
Murmanskda Azərbaycan tələbələri, Ümumrusiya Azərbaycan Konqresinin regional şöbəsinin və Rusiyanın Azərbaycanlı Gənclər Təşkilatının (RAGT) fəalları tərəfindən faciəyə həsr olunmuş elmi-praktik konfrans keçiriləcəkdir. Konfransda şəhidlərin ruhuna dualar oxunacaq, ehsan veriləcəkdir. Tədbir çərçivəsində, həmçinin sənədli film nümayiş etdiriləcək və fotosərgi təşkil olunacaqdır.
20 Yanvar faciəsinin 22-ci ildönümünə həsr olunmuş tədbirlər Ukrayna, Belarus və Moldovada da keçiriləcəkdir.
Avropanın ayrı-ayrı ölkələrində yaşayan soydaşlarımız da faciə qurbanlarının xatirəsini yad edirlər. Almaniyanın Berlin, Maqdeburq, Drezden şəhərlərində fəaliyyət göstərən Almaniyadakı Azərbaycanlıların Koordinasiya Mərkəzi (AAKM), Azərbaycan Evi, “Xəzər” Hannover Cəmiyyəti, “Alm.Az“ Cəmiyyəti tərəfindən keçirilmiş tədbirlərdə şəhidlərin xatirəsi anılmışdır. Mərasimlərdə Qanlı Yanvar faciəsinin Azərbaycan tarixindəki rolu barədə yerli ictimaiyyətə, eləcə də digər diasporların nümayəndələrinə ətraflı məlumat verilmişdir.
Maqdeburq şəhərində keçirilmiş “Demokratiya yolları” adlı tədbirdə Zaxhsen-Anhalt vilayəti üzrə Alman-Azərbaycan Mədəniyyət Cəmiyyətinin sədri Yaşar Niftəliyev, Hannover şəhərində fəaliyyət göstərən “Xəzər” Cəmiyyətinin sədri Etibar Qəniyev iştirakçılara 20 Yanvar faciəsi barədə ətraflı məlumat vermişlər. Tədbirin sonunda faciəyə həsr edilmiş sənədli film göstərilmişdir.
Almaniyanın Drezden şəhərində isə „Alm.az“ cəmiyyətinin təşkilatçılığı ilə baş tutmuş mərasimdə cəmiyyətin sədri Ağahüseyn Babayev tədbir iştirakçılarına faciənin tarixi, Azərbaycan xalqına qarşı törədilən misli görünməmiş terror aktı barədə məlumat vermişdir. Tədbirin sonunda „Azadlığa aparan yollar“ sənədli filmi nümayiş etdirilmişdir. Mərasimdə soydaşlarımızla yanaşı, alman ictimaiyyətinin, Drezdendə fəaliyyət göstərən konsulluqların, eləcə də rus, yəhudi, Ukrayna, qazax icmalarının nümayəndələri iştirak etmişlər.
Qanlı Yanvar hadisələrinin 22-ci ildönümü ilə bağlı tədbirlər Almaniyanın Kassel, Marburq, Höttingen şəhərlərində fəaliyyət göstərən Azərbaycan diaspor təşkilatları tərəfindən də təşkil olunacaqdır.
İsveç Krallığında fəaliyyət göstərən “Durna” dərnəyi, Azərbaycan Federasiyası, “Xəzər” Azərbaycan-İsveç Dostluq Cəmiyyəti tərəfindən Stokholm, Höteborq, Malmö şəhərlərində 20 Yanvar şəhidlərinin xatirəsi yad ediləcəkdir. Tədbilərdə sovet ordusunun Azərbaycan xalqına qarşı törətdiyi misli görünməmiş cinayət barədə məlumat veriləcək, foto və videomateriallar nümayiş etdiriləcəkdir.
20 Yanvar faciəsinin 22-ci ildönümünə həsr olunmuş tədbirlər Fransa, Danimarka, Niderland, İtaliya, Böyük Britaniyada da keçiriləcəkdir. Norveç Krallığında Norveç Azərbaycanlıları Gənclər Təşkilatı tərəfindən “20 Yanvar-Qan yaddaşımız” adlı konfrans, Finlandiyada “Azəri-Fin” Dostluq Cəmiyyəti tərəfindən “Qara Yanvar” adlı ədəbi-bədii kompozisiya nümayiş etdiriləcəkdir.
Qanlı Yanvar faciəsi Gürcüstan, Qazaxıstan, Özbəkistan, Qırğızıstanda yaşayan azərbaycanlılar tərəfindən də qeyd olunacaqdır. Türkiyənin Ankara, İstanbul, İzmir, Kocaeli, Adana, Antalya, Ədirnə və digər şəhərlərində 20 Yanvar hadisələrinə həsr olunmuş konfrans və “dəyirmi masa”lar keçiriləcək, fotosərgilər təşkil ediləcəkdir.
Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin sədri Samir İmanov isə Dubay Əmirliyinin hökumət nümayəndələri ilə görüşmüşdür. S.İmanov Dubayın mərkəzi kitabxanasına 1990-cı ilin 20 Yanvar faciəsindən bəhs edən ərəb dilində nəşrlər, Heydər Əliyev Fondunun hazırladığı “Qarabağ həqiqətləri” toplusu, ərəb dilində “Azərbaycan haqqında 100 suala cavab”, Azərbaycanın mədəni irsi və tarixinə dair kitablar, Azərbaycanın xəritəsi və təqvimlər təqdim etmişdir...
Misir Ərəb Respublikasında da ölkə ictimaiyyətinə 20 Yanvar faciəsi barədə məlumat veriləcək, Küveytdə “20 Yanvar şəhidləri” adlı fotosərgi təşkil olunacaqdır.
ABŞ-da fəaliyyət göstərən Hyuston-Bakı Qardaşlaşmış Şəhərlər Assosiasiyası 20 Yanvar faciəsi barədə yerli ictimaiyyəti məlumatlandırmaq məqsədi ilə tədbir keçirmişdir. ABŞ Azərbaycanlıları Şəbəkəsi (USAN) 20 Yanvar hadisələrinin 22-ci ildönümü ilə bağlı yeni kampaniyaya - məktubgöndərmə kampaniyasına start vermişdir. ABŞ-ın rəsmi şəxslərinə ünvanlanan bu məktublarda 1990-cı il yanvarın 19-dan 20-nə keçən gecə sovet qoşunlarının Bakıda törətdiyi faciə barədə ətraflı məlumat verilir.
Kanadada fəaliyyət göstərən Alberta-Azərbaycan Mədəniyyət Mərkəzi və Kanada-Azərbaycan Təşkilatlar Assambleyasının təşəbbüsü ilə ölkənin Kalqari və Ottava şəhərlərində 20 Yanvar faciəsi qurbanlarının xatirəsi yad ediləcəkdir.
Latın Amerikasındakı Azərbaycan Assosiasiyası da Azərbaycanın Meksikadakı səfirliyi ilə birlikdə 20 Yanvar şəhidlərinin xatirəsini yad etmək məqsədilə anım mərasimi keçirəcəkdir.
Avstraliyada fəaliyyət göstərən Dostluq Cəmiyyəti Qanlı Yanvar faciəsinin 22-ci ildönümünə həsr olunmuş konfrans keçirəcək, ictimaiyyətə keçmiş Sovet İttifaqının Azərbaycan xalqına qarşı xüsusi amansızlıqla törətdiyi terror aktı barədə məlumat verəcəkdir.
Dünyanın müxtəlif ölkələrində yaşayan azərbaycanlıların faciənin 22-ci ildönümünə və şəhidlərimizin xatirəsinə həsr olunmuş tədbirləri yanvarın sonunadək davam edəcəkdir.
Bölmənin digər xəbərləri
