DÜNYA BANKI İLƏ DANIŞIQLAR ÜMİDVERİCİDİR
Xəbər verdiyimiz kimi, Azərbaycanın təhsil, maliyyə və ədliyyə nazirliklərinin nümayəndələri ölkədə ikinci təhsil islahatı proqramı üçün kredit almaq məqsədi ilə Vaşinqtonda Dünya Bankı ilə danışıqlar aparırdılar. Aprelin 9-da nümayəndə heyəti müzakirələri başa vuraraq Vətənə dönmüşdur. Danışıqların yekunu olaraq protokol imzalanmış və islahat proqramının ilk 4 ilinə sərf olunacaq 18 milyon dollar məbləğində kreditin alınması haqqında sazişin layihəsi hazırlanmışdır. Alınandan on il sonra ödənilməsinə başlanacaq kreditin illik 0, 75 faizlə 35 il müddətində qaytarılması nəzərdə tutulur.
Təhsil naziri Misir Mərdanov yola düşməzdən əvvəl AZƏRTAC-ın müxbiri ilə söhbətində danışıqların nəticələrini müsbət qiymətləndirərək demişdir ki, biz istədiyimizə nail ola bildik, Azərbaycan tərəfi layihəyə bir sıra dəyişikliklər etdi.
Xatırladaq ki, islahat proqramının ilk mərhələdə məqsədlərdən biri 3 bölgədə eksperimental layihələr həyata keçirməkdir. Yəni alınan vəsait İsmayıllı, Ucar və Əli Bayramlıda təhsilin səviyyəsinin qaldırılması, məktəblərin təmiri, yeni müasir avadanlıqla təchizatı, kompüterlərin alınması, kitabxanaların əsaslı şəkildə dəyişdirilməsi, yerli müəllimlərə təkmilləşdirmə və təlim kurslarının keçirilməsinə sərf olunacaqdır.
Bundan əlavə, Təhsil Nazirliyində 3 yeni departamentin yaradılması nəzərdə tutulur.
Kredit çərçivəsində orta məktəb kitabxanalarına “Ekson” şirkətinin buraxdığı “Uşaq Ensiklopediyası” alınacaq. Daha bir yenilik ümummilli imtahanların keçirilməsidir. Nazir M. Mərdanov xatırlatmışdır ki, dünyanın inkişaf etmiş ölkələrində şagirdlərin bu və ya digər fənn üzrə bilik səviyyəsini müəyyən etmək üçün milli imtahanlar keçirilir. Biz ilk mərhələdə ana dili və riyaziyyat fənlərindən belə imtahanların keçirilməsini planlaşdırırıq.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
