Bakı, 3 avqust, AZƏRTAC

Bu həftənin sonunda dünya birjalarında səhmlər xeyli ucuzlaşıb, ən çox zərər görən Yaponiyanın “Nikkei 225” indeksi investorların ABŞ iqtisadiyyatındakı zəifləmə əlamətlərindən təlaşa düşərək 5,8 faiz dəyər itirib. Son 3 ay ərzində isə yapon indeksi 6,2 faiz ucuzlaşıb.

AZƏRTAC “Bloomberg” agentliyinə istinadla xəbər verir ki, bu mənfi tendensiya ABŞ Federal Ehtiyat Sisteminin (FED) iqtisadi artımı aşağı salmazdan əvvəl faiz dərəcələrini endirəcəyi ilə bağlı narahatlıqdan qaynaqlanır. “Wall Street”də geriləmə başqa birjalara da mənfi təsir göstərib. FED-in sədri Cerome Pauel ABŞ Mərkəzi Bankının bu həftəki iclasında faiz dərəcələrində azalmanın sentyabr ayında ola biləcəyini bildirib.

“Interactive Brokers” kompaniyasının analitikləri qeyd ediblər ki, FED-in bu açıqlaması qlobal birjalarda təlaşa səbəb olub. Cümə günü çox gözlənilən məşğulluq hesabatından sonra “S&P 500” indeksi 0,9 faiz, “Dow Jones” sənaye indeksi isə 0,5 faiz azalıb. Texnologiya nəhəngi “Intel”in satışdan sonrakı ticarətdə səhmlərinin təxminən 19 faiz aşağı düşməsi vəziyyəti daha dramatik hala gətirib. Çip istehsalçısı “Nvidia” və AMD kimi daha uğurlu rəqiblərlə güclü rəqabət aparmaq üçün kütləvi işçi qüvvəsinin 15 faizini, təxminən 15 min iş yerini ixtisar etdiyini bildirib.

Avropa ticarətində Almaniyanın DAX indeksi 1,4 faiz azalaraq 17 834,67 bəndədək, Fransanın “CAC 40” indeksi isə 0,7 faiz azalaraq 7 315,93 bəndədək düşüb. Londonda “FTSE 100” indeksi 0,4 azalaraq 8 245,92 bəndə qədər azalıb.