Dünya parlamentarizmi Azərbaycanda keçirilən tədbirləri diqqətdə saxlayır ŞƏRH
Bakı, 2 fevral, AZƏRTAC
Azərbaycanda növbədənkənar prezident seçkiləri günü yaxınlaşdıqca dost ölkələr, konfederativ qurumlar, eləcə də beynəlxalq təşkilatların bizə olan münasibətlərində müxtəlif mövqelərin sərgiləndiyinin şahidi oluruq. Keçdiyimiz günlərdə yaşadığımız xoşagəlməz hadisələrdən biri də Avropa Şurası Parlament Assambleyasında Azərbaycana, xüsusilə də 2020-ci ildə müzəffər Azərbaycan Ordusunun BMT Təhlükəsizlik Şurasının məlum dörd qətnaməsini rəhbər tutaraq beynəlxalq ədalətin, eləcə də Azərbaycanın suverenliyinin təmin olunması istiqamətindəki təkbaşına fəaliyyətinə qarşı qəbul olunmuş qərardır. Şübhəsiz ki, bu qərar riyakarlıq və ikili standartlığın dünya ictimaiyyətinə açıq nümayiş olunmasından başqa bir şey deyil.
Bu fikirləri AZƏRTAC-a müsahibəsində Milli Məclisin deputatı Məzahir Əfəndiyev söyləyib. Deputat qeyd edib ki, müasir müstəqil Azərbaycanda sağlam siyasi mühitin yaradılması, habelə demokratik inkişafın təmin edilməsi üçün əsas amillərdən biri də parlamentarizm ənənələrinin formalaşdırılması oldu. 1993-cü il iyunun 15-dən oktyabrın 3-dək Ulu Öndər Heydər Əliyevin rəhbərliyi ilə parlamentarizm ənənələri yeni nəfəs, yeni qüvvə aldı. Heydər Əliyev qısa müddətdə sağlam siyasi mühit formalaşdırmağı bacardı, Milli Məclisə siyasi mədəniyyət gətirdi.
Uzun illər ərzində istər palamentlərarası dostluq qrupları, istərsə də müxtəlif nüfuzlu beynəlxalq təşkilatlar çərçivəsində Milli Məclis öz beynəlxalq fəaliyyətini formalaşdırmağa nail oldu.
Deputat Məzahir Əfəndiyev vurğulayıb ki, bu gün parlament Azərbaycanın çoxvektorlu xarici siyasətində mühüm rol oynayır, parlamentarilər ölkənin xarici siyasətinin dəstəklənməsində fəal iştirak edirlər: “Təsadüfi deyil ki, bu gün, həmçinin Azərbaycana dost olan və hər zaman hörmətə əsaslanan qarşılıqlı münasibətlərmizin mövcud olduğu, eyni zamanda, haqqı sonunadək müdafiə etmək bacarığını hələ də qoruyub saxlayan qurumların mövqelərini müşahidə etməkdəyik.
Bu qurumlardan biri də 1989-cu ildə yaradılmış, dünyada sülhü, demokratiyanı, davamlı inkişafı təşviq edən və bu günədək dünyanın ən böyük parlamentlərarası şəbəkəsi kimi fəaliyyət göstərən Parlamentlərarası İttifaqdır. Fevralın 1-də Parlamentlərarası İttifaqın Baş katibi Martin Çunqonqun Azərbaycana baş tutan səfəri, ölkəmizdə keçiriləcək dünyanın ən mötəbər tədbiri olan COP29-un hazırlıq mərhələsində Azərbaycan Prezidenti ilə fikir mübadiləsi aparması, ətraf mühit və iqlim dəyişikliyi istiqamətlərində beynəlxalq səyləri dəstəkləyən tədbirin təşkil olunma təşəbbüsü ilə çıxış etməsi gələcək qarşılıqlı əməkdaşlığın faydalılığını ortaya qoydu.
Görüş zamanı Martin Çunqonq regionda sülhün əldə olunması istiqamətində də ölkə başçısı ilə söhbət apardı. Prezident İlham Əliyevin söylədiyi kimi, Azərbaycan öz torpaqlarını beynəlxalq hüquq və prinsipləri rəhbər tutaraq azad edib. Azərbaycanda separatizmin kökünün kəsilməsi üçün həm maliyyələşmə mənbələrinin aradan qaldırılmasına nail olunub, həm də mifə çevrilmiş dırnaqarası “erməni faşizmi ideologiyası” birdəfəlik məhv edilib. Bununla yanaşı, Azərbaycan multikultural dəyərlərə sadiqliyini nümayiş etdirərək Cənubi Qafqazda bütün xalqların sülh və təhlükəsizlik içində yaşamasını təmin etmək üçün beş prinsipə əsaslanan Böyük Sülh Sazişinin imzalanmasını ilk olaraq təklif edib.
Lakin bu tolerant və saf niyyətlərin qarşılığında, revanşist və separat qüvvələrin tör-töküntülərinin ötən il sentyabr ayının 9-da Qarabağda elan etdikləri qondarma “seçkilər” adı altında tamaşaya, habelə hərbi təxribatlara son qoymaq üçün sentyabrın 19-da Azərbaycan dövləti lokal xarakterli antiterror tədbirləri həyata keçirdi.
Görüş əsnasında ölkə başçısı Azərbaycanın haqlı mövqeyini bir daha nümayiş etdirərək, ölkəmizdə separatizm meyillərinin bundan sonra baş qaldırmayacağını və qurulmaqda olan gələcəyin inkişafını məhz dayanıqlı sülhün əldə olunmasında gördüyünü qeyd etdi”.
Deputat vurğulayıb ki, Azərbaycan təmsil olunduğu bütün beynəlxalq platformalarda öz hüquq və vəzifələrini davamlı olaraq qoruyub saxlayır, bundan sonra da qarşılıqlı hörmət və ədalətə əsaslanan münasibətlərin inkişaf etdirilməsində maraqlarını Azərbaycan xalqının iradəsində bir daha bəyan edir.
Bölmənin digər xəbərləri
