Dünyada koronavirus qurbanlarının sayı 3 milyon nəfəri ötüb
Bakı, 16 aprel, AZƏRTAC
Dünyada COVID-19 infeksiyasından ölənlərin sayı 3 milyon nəfəri ötüb.
AZƏRTAC pandemiyanın statistikasını aparan Worldometer saytına istinadla xəbər verir ki, aprelin 15-də dünyada 13 min 895 nəfər COVID-19 xəstəliyindən vəfat edib. Bununla da koronavirus infeksiyası səbəbindən ölənlərin ümumi sayı 3 milyon 366 nəfərə çatıb.
Saytın son məlumatına əsasən, indiyədək dünyada koronavirus infeksiyasına 139 milyon 722 mindən çox yoluxma halı qeydə alınıb. Eyni zamanda, 118 milyon 773 min nəfər COVID-19 xəstəliyindən sağalıb, müalicəsi davam edən 17 milyon 912 min xəstədən 106 min 890 nəfərin vəziyyəti ağır qiymətləndirilir.
ABŞ koronavirusa yoluxanların sayına görə dünyada ilk sırada qərarlaşıb - 32 milyon 224 min nəfər. İlk beşliyə daxil olan Hindistanda 14 milyon 291, Braziliyada 13 milyon 758 min, Fransada 5 milyon 187 min, Rusiyada isə 4 milyon 675 min nəfərdə COVID-19 infeksiyası aşkarlanıb.
Birləşmiş Ştatlar virusdan ölənlərin sayına görə də dünya lideridir - 578 min nəfər. Sonrakı yerlərdə qərarlaşan Braziliyada 365 min, Meksikada 211 min, Hindistanda 174 min, Böyük Britaniyada isə 127 min nəfər koronavirus səbəbindən həyatını itirib.
Qeyd edək ki, 2020-ci il mart ayının 11-də Ümumdünya Səhiyyə Təşkilatı yeni koronavirus infeksiyasının yayılmasını pandemiya elan edib.
Bölmənin digər xəbərləri
