Düşənbədə 28 May - Respublika Günü münasibətilə rəsmi qəbul keçirilib
Düşənbə, 26 may, AZƏRTAC
Azərbaycanın Tacikistandakı səfirliyi 28 May - Respublika Günü münasibətilə Düşənbədə rəsmi qəbul keçirib.
Tədbirdə Tacikistanın ilk Prezidenti Kahar Mahkamov, sabiq xarici işlər naziri Xamroxon Zarifi, Ali Məclisin deputatları, ABŞ, Rusiya, İran, Pakistan, Belarus, Qırğızıstan, Türkmənistan, Özbəkistanın bu ölkədəki səfirləri, diplomatik nümayəndəliklərin və beynəlxalq təşkilatların əməkdaşları, elm, mədəniyyət və incəsənət xadimləri, diasporumuzun üzvləri, jurnalistlər iştirak ediblər.
Əvvəlcə Azərbaycanın və Tacikistanın dövlət himnləri səsləndirilib.
Mərasimdə çıxış edən xarici işlər naziri Siracəddin Aslov Respublika Günü münasibətilə Tacikistan hökuməti adından Azərbaycan xalqını təbrik edib. O bildirib ki, Azərbaycan dövlətinin son illərdə bütün sahələrdə əldə etdiyi uğurlar bizi sevindirir. Bu uğurların əldə olunmasında Azərbaycan xalqının böyük oğlu Heydər Əliyevin rolunu xüsusi qeyd etmək lazımdır. Azərbaycan Prezidenti İlham Əliyevin ötən ilin oktyabrında Tacikistana rəsmi səfəri zamanı Prezident Emoməli Rahmon ilə aparılan danışıqlar nəticəsində iki ölkənin gələcək inkişaf istiqamətlərini müəyyən edən sənədlər imzalanıb. Bizim vəzifəmiz isə xalqlarımızın rifahı naminə əməkdaşlıq əlaqələrimizi bundan sonra da qarşılıqlı maraqlar əsasında davam etdirməkdir.
Azərbaycanın Tacikistandakı səfiri Abbasəli Həsənov cəmi 23 ay yaşayan, Şərqdə ilk demokratik parlamentli respublika olan Azərbaycan Xalq Cümhuriyyətinin (AXC) tarixi, qısa müddətdə gördüyü işlər haqqında məlumat verib.
Diplomat 1991-ci ildə müstəqilliyini bərpa edən respublikamızın ilk illərdə müharibə və xaosla üzləşməsi, nəticədə torpaqlarımızın 20 faizinin Ermənistan silahlı qüvvələri tərəfindən işğal olunması, bir milyondan artıq vətəndaşımızın öz vətənində qaçqın və məcburi köçkünə çevrilməsi haqqında məlumat verib. Bildirilib ki, 1993-cü ildə xalqımızın təkidli tələbi ilə hakimiyyətə qayıdan ümummilli lider Heydər Əliyev ilk növbədə vətəndaş müharibəsinin qarşısını aldı, neft strategiyasını həyata keçirməklə müstəqil, suveren Azərbaycanın dinamik inkişafının əsasını qoydu.
A.Həsənov Ermənistan-Azərbaycan, Dağlıq Qarabağ münaqişəsi haqqında danışaraq deyib ki, BMT Təhlükəsizlik Şurası Azərbaycanın işğal olunmuş torpaqlarının qeyd-şərtsiz azad olunması barədə 4 qətnamə qəbul edib. Buna baxmayaraq, Ermənistan bu qətnamələrin tələblərini bu günə qədər də yerinə yetirmir. Münaqişənin hələ də həll olunmaması region üçün böyük təhlükə yaradır.
Səfir bildirib ki, bu günə qədər Azərbaycana 160 milyard dollardan artıq sərmayə qoyulub. Bu vəsaitin yarıdan çoxu daxili sərmayələrdir. Bu gün Azərbaycan Cənubi Qafqazın lider dövlətinə çevrilib. Bu inkişaf ulu öndər Heydər Əliyevin düşünülmüş, uzaqgörən siyasətinin nəticəsidir.
Diplomat çıxışının sonunda vurğulayıb ki, bu il iyunun 12-də start götürəcək birinci Avropa Oyunlarının Azərbaycanda keçirilməsi ölkəmizin sabitliyinin, beynəlxalq aləmdə nüfuzunun, dinamik inkişafının əsas göstəricisidir.
Çıxışlardan sonra “Azərbaycan son 20 ildə” sənədli filmi nümayiş etdirilib.
İştirakçılara Respublika Günü ilə bağlı Azərbaycan, tacik, ingilis və rus dillərində hazırlanmış məlumatlar toplusu, ölkəmizin tarixini, mədəniyyətini, turizm potensialını əks etdirən materiallar paylanıb.
Sonra Azərbaycandan dəvət olunmuş muğam ifaçıları Günay İmamverdiyeva və Elşad Məmmədov tarda Altay Niftəliyevin, kamançada Araz Ağaverdiyevin müşayiəti ilə muğam, xalq mahnıları və təsniflərimizi ifa ediblər.
Qulu Kəngərli
AZƏRTAC-ın xüsusi müxbiri
Düşənbə
Bölmənin digər xəbərləri
