DÜNYA
ƏFQANISTANIN SABİQ KRALI VƏTƏNƏ QAYITDI
Əfqanıstanın sabiq kralı Məhəmməd Zahir Şah İtaliyada, demək olar, 30 illik mühacirətdən sonra bu ölkəni tərk etmişdir. 87 yaşlı keçmiş monarx İtaliya Hərbi Hava Qüvvələrinin “Boinq-707” təyyarəsi ilə aprelin 18-də səhər Kabilə gəlmişdir.
Uçuş zamanı Zahir Şahı bir gün əvvəl İtaliya paytaxtına gələn Əfqanıstan müvəqqəti hökumətinin başçısı Həmid Karzay müşayiət etmişdir. O, Romada bildirmişdir ki, özünü Əfqanıstanın gələcək lideri saymır. Karzay demişdir: “İndi mən ölkəyə müvəqqəti rəhbərlik etməli olan hökumətin başçısıyam. Əfqanıstanın siyasi gələcəyini Loyya Cirgə müəyyənləşdirəcəkdir”. O, posttalib Əfqanıstanında birinci dərəcəli siyasi rol oynayıb-oynamayacağı barədə jurnalistlərin sualına cavab verərək demişdir ki, “əgər Loyya Cirgə ona ölkəyə rəhbərliyi davam etdirməyi etibar edərsə”, bunu özünə şərəf bilər, yox, əgər belə olmasa, onda “mən bu qərara hörmətlə yanaşacağam və işdən uzaqlaşacağam: bu, bir qədər istirahət etmək üçün yaxşı imkan olacaqdır”.
İTAR-TASS-ın verdiyi xəbərə görə, Əfqanıstanın sabiq Prezidenti Burhanəddin Rəbbani kral Zahir Şahın vətənə qayıtmasını alqışlamış, lakin ölkədə konstitusiyalı monarxiyanı bərpa etmək ideyasının əleyhinə çıxmışdır. Rəbbani bəyan etmişdir ki, Zahir Şah vətənə dönə bilər, çünki onun buna haqqı var. Amma dünya idarəetmənin respublika formasını çoxdan qəbul etmişdir və ona görə də monarxiyanın bərpası məqbul deyildir.