“EkoKarvan – elektrik avtomobillərin Laçına səfəri” adlı ekoloji yürüş başlayıb
Laçın, 30 avqust, Aydın Yavərzadə, AZƏRTAC
Avqustun 30-31-i günlərini əhatə edən “EkoKarvan – elektrik avtomobillərin Laçına səfəri” adlı ekoloji yürüş-festivalı start götürüb. Bakıdan Laçına doğru tam elektrikli avtomobillərdən ibarət karvan yola çıxıb.
Laçın Rayonunda Bərpa Tikinti və İdarəetmə Xidmətindən AZƏRTAC-ın bölgə müxbirinə verilən məlumata görə, tədbirdə ümumilikdə 25-ə yaxın elektrikli avtomobil və 70-ə yaxın heyət iştirak edir. Yürüş 30 avqustda Bakıdan start götürüb və Şuşaya istiqamətlənib. Şuşada qısa dayanacaqdan sonra avtomobillər xüsusi polis müşayiəti ilə Laçına yola düşəcəklər. Günün sonunda Laçında qala-gecəsi təşkil olunacaq. Gecədə müxtəlif proqramlar və musiqi çıxışları təqdim ediləcək.
Avqustun 31-də Laçın rayonunun Seyrangah ərazisində rəsmi tədbir proqramı baş tutacaq. Tədbirdə Laçın rayonunda Bərpa, Tikinti və İdarəetmə Xidmətinin əməkdaşları, sponsor və tərəfdaş qurumlar, həmçinin rayon sakinləri iştirak edəcəklər. Proqram çərçivəsində canlı musiqi, təqdimatlar və iştirakçıların təltif olunması nəzərdə tutulur.
Festival ekoloji nəqliyyat vasitələrinin təbliği, yaşıl enerji dəyərlərinin təşviqi, eləcə də Qarabağın və Şərqi Zəngəzurun gözəl guşələrində yeni turizm imkanlarının tanıdılması məqsədilə keçirilir.
Bölmənin digər xəbərləri
