“Elektron Bələdiyyə” portalının təqdimatı olub
Bakı, 18 aprel, AZƏRTAC
Azərbaycan Bələdiyyələrinin Milli Assosiasiyaları (ABMA) tərəfindən yaradılmış “Elektron Bələdiyyə” portalının istifadəyə verilməsinə həsr olunmuş tədbir keçirilib.
ABMA-dan AZƏRTAC-a bildirilib ki, tədbirdə Azərbaycan Şəhər Bələdiyyələrinin Milli Assosiasiyasının sədri Təmraz Tağıyev son dövrlər bələdiyyələrdə vergi uçotunun qurulması, vergi daxilolmalarının artırılması və son birləşmədən sonra bələdiyyə institutunun nüfuzunun artırılması istiqamətində həyata keçirilən tədbirlər barədə məlumat verib. Assosiasiyanın sədri deyib ki, Azərbaycan Prezidentinin müvafiq Fərmanına uyğun olaraq, fiziki şəxslər tərəfindən binalara görə əmlak vergisinin ödənilməsi mexanizminin təkmilləşdirilməsi məqsədilə “E-bələdiyyə” portalı yaradılıb. O, portalın bələdiyyə xidmətlərinin vətəndaşlara əlçatanlığının təmin edilməsinə, bələdiyyə-vətəndaş münasibətlərinin yeni səviyyəyə qaldırılmasına şərait yaradacağına əminliyini vurğulayıb.
ABMA-nın Bələdiyyələrin Onlayn Xidmət Mərkəzinin direktoru Adil Əhmədov “E-bələdiyyə” portalının funksional imkanları barədə məlumat verib. O qeyd edib ki, yerli vergi ödəyiciləri e-belediyye.az portalında qurulmuş elektron kabinetlərinə “Digital Login” servisi üzərindən müxtəlif identifikasiya vasitələri ilə daxil ola bilərlər. Vətəndaşlar elektron kabinetləri vasitəsilə bələdiyyədə uçotda olan vergitutma obyektləri, vergi borcunun tərkibi, ödəniş tarixçələri və bələdiyyə bildirişləri barədə ətraflı məlumat əldə etməklə yanaşı, vergi borclarını da ödəyə biləcəklər. Bundan başqa, bələdiyyələrlə vətəndaşlar arasında olan “məsafəni” azaltmaq, həmçinin bu münasibətləri sadələşdirmək və şəffaflaşdırmaq məqsədilə portalda bələdiyyə sorğularında iştirak və bələdiyyələrə təklif vermək, məlumat uyğunsuzluğu barədə aidiyyəti bələdiyyəyə müraciət etmək imkanı yaradılıb. Mərkəzin direktoru vurğulayıb ki, ilkin mərhələdə “E-bələdiyyə” portalına Bakı şəhərinin bələdiyyələri qoşulacaq. Digər bələdiyyələrin portala qoşulması isə mərhələli şəkildə yerlərdə təqdimatlar təşkil etməklə həyata keçiriləcək və prosesin yaxın aylarda yekunlaşdırılması nəzərdə tutulur.
Qeyd edək ki, portalın tətbiqi bələdiyyə xidmətlərinin səmərəliliyinin artmasına təkan verəcək, habelə yerli vergi ödəyiciləri öz hüquq və öhdəlikləri barədə daha çox məlumatlı olacaqlar.
Bölmənin digər xəbərləri
