Əliqismət Bədəlov: Ata yurdu övladlarını başına yığır
Bakı, 21 iyun, AZƏRTAC
Xalqımızın yaddaşına əbədi həkk olunmuş tarixi Qələbə soydaşlarımızın 30 ilə yaxın doğma yurd həsrətinə birdəfəlik son qoydu. Artıq məcburi köçkün həmvətənlərimiz işğaldan azad edilmiş ərazilərdəki dədə-baba yurdlarına qayıtmağa başlayıblar. 2022-ci il iyulun 19-dan etibarən Qarabağa Böyük Qayıdış prosesinə start verilib. Bu unudulmaz mənzərə mənə Prezident İlham Əliyevin 2003-cü il oktyabrın 31-də keçirilən andiçmə mərasimindəki nitqindən bəzi məqamları xatırlatdı. Dövlətimizin başçısının həmin mərasimdəki nitqindən bir fikri xatırlatmaq istərdim: “Azərbaycanın torpaqları işğaldan azad olunmalıdır, bir milyon qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun azad edəcəkdir”.
Qarşıya qoyulmuş bu çətin və şərəfli vəzifə artıq reallığa çevrilib. Bu gün ata yurdu övladlarını başına yığır.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, artıq dünyanın əksər dövlətləri Azərbaycanın öz torpaqlarını Ermənistanın işğalından azad etməsindən məmnundurlar. Bunu tarixi Qələbə münasibətilə dövlətimizin başçısına ünvanlanmış təbriklər də təsdiqlədi. Artıq bütün bunlar arxada qaldı. İndi dünya ictimaiyyətinin diqqəti məcburi köçkünlərin sevinc göz yaşı içərisində ata-baba yurdlarına, doğma ev-eşiklərinə, həyət-bacalarına qayıtmalarına yönəlib. Artıq köç növbəsi laçınlılara çatıb: “Xatırladım ki, ilk olaraq, Zəngilan rayonunun Ağalı kənd sakinləri 30 ilə yaxın həsrətdən sonra öz doğma yurdlarına qayıtdılar. 2021-ci ildə Kəlbəcər və Laçın yaylaqlarına 4500-dən artıq arı ailəsi köçürülüb. Şöhrəti bütün dünyaya yayılan Kəlbəcər balı əvvəlki şöhrətini qaytarır. Yəqin ki, hər kəs Prezident İlham Əliyevin 2021-ci il avqustun 16-da Kəlbəcərdə arıçılarla görüşüb söhbət etməyini xatırlayır. Həmin görüşdə Kəlbəcər balının yüksək keyfiyyəti barədə xoş sözlər söyləyən Prezident İlham Əliyev demişdi: “Bizim balımız da çox keyfiyyətlidir. İndi Kəlbəcər balı yəqin ki, bütün digər yerlərdən daha da keyfiyyətli olacaq. Ona görə gərək həm daxili bazarı təmin edəsiniz, həm də ki, ixrac edəsiniz”.
Siyasi şərhçi deyib ki, hazırda laçınlılar öz el-obasına qayıtmağa başlayıblar. Prezident İlham Əliyevin 2023-cü il mayın 28-də Laçın şəhərinə qayıdan əhali ilə görüşü, evlərin açarlarını dədə-baba yurdlarına dönən laçınlılara təqdim etməsi hər bir keçmiş məcburi köçkünün xatirəsində əbədi qalacaq. Bəli, bəzi araqarışdıranların və vəzifə odunda alışıb-yananların fikirləşdikləri kimi bu, xəyal və ya yuxu deyil, əsl reallıqdır. Bu reallıqları görmək istəyənlər işğaldan azad edilmiş Ağdam, Füzulu, Cəbrayıl, Zəngilan, Qubadlı, Laçın rayonlarına, Şuşa şəhərinə, Suqovuşan qəsəbəsinə gedə və şahid ola bilərlər. Necə ki, dünyanın müxtəlif ölkələrindən tanınmış ictimai-siyasi xadimlər, diplomatlar, turistlər, QHT və media nümayəndələri, parlament təmsilçiləri gəlirlər.
Hazırda Qarabağda və Şərqi Zəngəzurda yenidənqurma, tikinti və abadlıq işləri geniş vüsət alıb. Müharibədən dərhal sonra genişmiqyaslı tikinti-bərpa işlərini yalnız Azərbaycan kimi iqtisadi qüdrətə malik ölkə yerinə yetirə bilərdi. Necə ki, dünya birliyi buna şahidlik edir. Artıq işğaldan azad edilmiş ərazilərimiz dağıntı mərhələsini bərpa-quruculuq dövrü ilə əvəzləyib. Bütün bölgələrdə əsas diqqət infrastruktur layihələrinin icrasına yönəldilib. Laçın kimi çətin relyefə malik rayonda 2025-ci ildə istifadəyə veriləcək hava limanının tikintisi davam etdirilir. Buna qədər Füzuli və Zəngilan rayonlarında beynəlxalq hava limanlarının tikilib istifadəyə verilməsi Azərbaycanın bölgədə söz sahibi olmasının təsdiqidir.
“Məcburi köçkünlərin könüllü və təhlükəsiz dədə-baba yurdlarına qayıdışı dövlətimizin qarşıya qoyduğu prioritet vəzifədir. İşğaldan azad edilmiş ərazilərin dirçəldilməsi istiqamətində görülən işlər getdikcə sürətlənir, Böyük Qayıdış proqramı uğurla icra olunur. Bu gün Qarabağda və Şərqi Zəngəzurda ata yurdu öz sakinlərinə qucaq açıb, səbirsizliklə onların yolunu gözləyir”, - deyə Ə.Bədəlov bildirib.
Bölmənin digər xəbərləri
