“ƏMƏK GÜNÜ” ƏRƏFƏSİNDƏ ABŞ HÖKUMƏTİNİN HESABATINDA ÖLKƏDƏ 4,7 FAİZ İŞSİZLİK OLDUĞU BİLDİRİLİR
“Əmək günü” ABŞ-da 1894-cü ildən başlayaraq federal bayram elan olunmuşdur. Lakin Amerika əməkçilərinə təqvimdə öz bayramını əldə etmək asan başa gəlməmişdir. XIX əsrin sonlarında Amerikaya gözəl həyat axtarışına gələn mühacirlər gözlədikləri şəraitlə qarşılaşmırdılar. Onlar həftənin yeddi günü 10-12 saat ərzində işləməyə, azyaşlı uşaqlarını çörək pulu qazanmağa göndərməyə məcbur idilər. İş yerində xəsarət və ölüm halları gündəlik həyatın reallığına çevrilmişdi. İnsanlar uzun iş saatlarının azaldılması, uşaq əməyinin ləğvi, təhlükəsiz iş yerləri uğrunda mübarizə aparsalar da, həmkarlar ittifaqları təşkil olunmayınca hökumət bu səylərin qarşısını alırdı. Bu hərəkatın banisi Piter MakQuayer 1882-ci ildə minlərlə insanla Nyu-Yorkun küçələrinə çıxıb, tətil edib uzun iş saatlarını qısaltmağı tələb etmişdir. Piter MakQuayerin çağırışları tədricən ölkənin başqa ştatlarına da yayılmağa başlamışdı.
Bu il “Əmək günü” ərəfəsində ABŞ hökumətinin yaydığı hesabat iş bazarında ciddi problemlərin olmadığından xəbər verir. Rəsmi olaraq ölkə üzrə işsizlik 4,7 faiz təşkil edir. Hesabata görə, son üç ildə ABŞ-da 5 milyondan artıq yeni iş yerləri açılmışdır.
Sentyabrın ilk bazar ertəsi günü təhlilçilərə Amerikanın əməkçiləri və onların cəmiyyətdəki rolu barədə müzakirə mövzusu versə də, “Əmək günü” artıq çoxdandır qeyri-siyasi bayram kimi qəbul olunubdur. Üçgünlük uik-end zamanı hamı yayın son günlərindən istifadə etməyə - çimərliyə getməyə, ailə və dostlarla birgə vaxt keçirməyə çalışır. Tələbələr üçün isə bu, yeni tədris ilinin başlanması deməkdir.
Bölmənin digər xəbərləri
