Emmanuel Makronun pensiya islahatının təxirə salınması ilə bağlı açıqlaması qeyri-müəyyənlik yaradıb
Paris, 22 oktyabr, AZƏRTAC
Fransa Prezidenti Emmanuel Makronun pensiya islahatının tarixini təxirə salması ilə bağlı açıqlaması hökumətdə çaşqınlıq yaradıb. Pensiya islahatının gələcəyi sual altındadır.
AZƏRTAC xəbər verir ki, Makron açıqlaması siyasi arenada da yeni bir qeyri-müəyyənlik yaradıb. Onun Sloveniyaya səfərinin sonunda verdiyi bəyanat, hökumət daxilində fikir ayrılığını üzə çıxarıb və Baş nazir Sebastyən Lökornünün Fransa Sosialist Partiyasının dəstəyini almaq üçün verdiyi vədləri zərbə altında qoyub.
Makronun sözlərinə görə, söhbət islahatın ləğvindən və ya dayandırılmasından getmir. O, bunu sadəcə “vaxt cədvəlinin dəyişdirilməsi” adlandırıb.
“Bu, nə ləğv, nə də dayandırmadır. Bu, sadəcə 63 yaş həddinin 1 yanvar 2027-dən 1 yanvar 2028-ə keçirilməsi və bunun maliyyə qənaətləri ilə təmin olunmasıdır”, – deyə prezident bildirib.
Bu açıqlama, əvvəlki günlərdə Baş nazir Lökornü tərəfindən verilmiş “islahat dayandırılıb” açıqlaması ilə ziddiyyət təşkil edir. Sebastyən Lökornü oktyabrın 14-də ümumi siyasət nitqi zamanı pensiya islahatının dayandırıldığını elan etmişdi. Hətta bu qərarı Sosial Müdafiə Büdcəsinə dəyişikliklər edən məktub vasitəsilə Dövlət Şurasına təqdim etdiyini də bildirmişdi. Bu, qərarın hüquqi baxımdan qüvvəyə minməsi üçün vacib bir addım idi.
Hökumət məsələyə aydınlıq gətirmək üçün iki ardıcıl Nazirlər Şurası toplantısı planlaşdırıb. Lakin Prezidentin ifadə etdiyi “sadəcə tarix dəyişir” yanaşması, Baş nazirin islahatın dayandırıldığına dair verdiyi bəyanatlarla ziddiyyət təşkil edir və hökumət daxilində kommunikasiya böhranı yaşandığını göstərir.
Prezident Makron islahatın gələcəyinin hələ açıq qaldığını və xalq məsləhətləşməsi – yəni referendum ehtimalını da istisna etmədiyini bildirib.
“Referendum mümkün ola bilər, amma bunun nədən ibarət olacağını dəqiq bilmək lazımdır. Mənim vəzifəm bu qərarı indi vermək deyil”, - deyə Makron qeyd edərək parlamentdə sakit və təmkinli debatlara, sonra isə sosial tərəfdaşlarla (sindikatlar və işəgötürənlər) yeni danışıqlara çağırıb. Bu prosesin sonunda hansı yolun seçiləcəyinə qərar veriləcək.
Analitiklərə görə, Makronun bu çıxışı Baş nazir Lökornünün Sosialist Partiyası ilə qurmağa çalışdığı tarazlığı poza bilər. Sosialistlər islahatın dayandırılmasını müvəqqəti siyasi qələbə kimi qiymətləndirmişdilər. Lakin Prezidentin bəyanatı parlamentdə müxalifətin yenidən aktivləşməsinə səbəb ola bilər.
Emmanuel Makronun pensiya islahatı ilə bağlı “tarixi təxirə salmaq” ifadəsi hökumət daxilində fikir ayrılıqlarını üzə çıxarıb, Baş nazirin mövqeyini zəiflədib və islahatın gələcəyini bir daha qeyri-müəyyənliyə sürükləyib. Referendum ehtimalı açıq qalsa da, real addımların hansı istiqamətdə atılacağı hələ də bəlli deyil. Fransa Makronun ikinci mandatı müddətində siyasi sabitliklə bağlı yeni bir sınaqla üz-üzədir.
Bölmənin digər xəbərləri
