EQ.5 ştamının ölkəmizdə yayılması barədə rəsmi məlumat yoxdur
Bakı, 4 sentyabr, AZƏRTAC
Son bir ayda dünyada 1,5 milyon nəfər yeni növ koronavirus (COVID-19) infeksiyasına yoluxub. Bu, daha çox virusun EQ.5 mutasiyasının sürətlə yayılmasından qaynaqlanır. Qonşu ölkələrdə virusun yayıldığını nəzərə alsaq, onun Azərbaycanda da mövcud olmağı istisna edilmir.
AZƏRTAC xəbər verir ki, həkim-infeksionist Vasif Əliyevin dediyinə görə, yay mövsümündə xarici ölkələrə səfərlərin artması, kütləvi əyləncəli məkanlarda istirahət edənlərin çoxluğu xəstəliyin yayılmasına səbəb olan amillərdir: “Xəstəliyin əsas əlamətləri burun axıntısı, boğaz ağrısı, əzələ ağrıları, hərarət və halsızlıqdır. Virus sürətlə yayılaraq yuxarı tənəffüs yollarının infeksiyalarına səbəb olur”.
Onun dediyinə görə, xüsusilə immun sistemi zəif olanlar xəstəlikdən qorunmaq üçün sağlamlıqlarına daha ciddi yanaşmalıdırlar. “Xəstəlik çox ağır formada təzahür etmir, bir növ qrip formasında özünü büruzə verir. Xəstəliyə yoluxanların çoxu ev şəraitində simptomatik yollarla onu müalicə edirlər. Demək olar ki, xəstələrin hamısı həmin yolla müalicə olunur. Çoxlu maye istifadə etmək, evdə istirahət, şəxsi gigiyena qaydalarına riayət edilməsi, təmas zamanı tibbi maska taxmaq məsləhət görülür”.
Bölmənin digər xəbərləri
