“Ər və arvad” tamaşası 100 il sonra yenidən Azərbaycan səhnəsində oynanılmışdır
Bakı, 16 oktyabr (AZƏRTAC). Oktyabrın 16-da Azərbaycan Dövlət Musiqili Komediya Teatrında Üzeyir Hacıbəylinin “Ər və arvad” operettasının premyerası olmuşdur.
AZƏRTAC xəbər verir ki, əsər Üzeyir Hacıbəylinin 125, Musiqili Komediya Teatrının isə 100 illik yubileyləri münasibətilə səhnələşdirilmişdir.
Tamaşanın quruluşçu rejissoru Yusif Əkbər, musiqi rəhbəri Nazim Hacıəlibəyov, rəssamı Eldar Qurbanovdur.
Yeni quruluşda səhnə əsərində əsas rolları xalq artistləri Afaq Bəşirqızı, Fatma Mahmudova, Yaşar Nuri, İlham Namiq Kamal, Arif Quliyev, əməkdar artistlər Elçin Həmidov, Əkbər Əlizadə və başqaları ifa etmişlər.
1909-cu ildə Üzeyir Hacıbəyli tərəfindən qələmə alınmış Şərqin ilk operettası 1910-cu ildə Musiqili Komediya Teatrının səhnəsində tamaşaya qoyulmuşdur. Həmin vaxtdan keçən 100 il ərzində əsər heç bir teatrın səhnəsində oynanılmamışdır.
Yeni quruluşda təqdim edilmiş səhnə əsəri tamaşaçılar tərəfindən böyük maraqla qarşılanmışdır.
Bölmənin digər xəbərləri
